Pelosi shpreh mbështetje të palëkundur për Kosovën

Kryetarja e Dhomës së Përfaqësuesve të Shteteve të Bashkuara, Nancy Pelosi, priti në një takim në Washington kryetarin e Parlamentit të Kosovës, Kadri Veseli, të cilit i shprehu mbështetjen e palëkundur amerikane për Kosovën, raporton RFE.

Në një komunikatë të lëshuar nga zyra e Veselit thuhet se Pelosi “u zotua se do të jetë gjithmonë në përkrahje të Kosovës” dhe theksoi se “Kosova mund të llogarisë në ndihmën e saj dhe të Kongresit Amerikan”.

“Amerika do të jetë përkrah Kosovës dhe do t’ju mbështesë gjithmonë”, tha Pelosi.

Veseli, në anën tjetër, kërkoi nga Pelosi që SHBA-ja të ketë përfshirje edhe më të madhe dhe më të drejtpërdrejtë në proceset që po kalon Kosova.

“Gjatë këtij takimi, Veseli po ashtu ka kërkuar nga zonja Pelosi përkrahje të Kongresit dhe institucioneve të SHBA-së për ushtrinë e Kosovës, si dhe për iniciativën për dënimin e gjenocidit serb dhe të krimeve dhe dhunimeve gjatë luftës në Kosovë”, thuhet në komunikatë.

Veseli e ftoi Pelosin që së shpejti ta vizitojë Kosovën.