Penalizohet Putin, sanksione ndaj bankës qendrore ruse. Përjashtohen disa huadhënës nga Swift

SHBA dhe aleatët perëndimorë do të vendosin sanksione ndaj Bankës Qendrore të Rusisë dhe do të përjashtojnë disa nga huadhënësit e vendit nga sistemi global i pagesave Swift, duke dhënë përgjigjen e tyre më të ashpër deri më tani ndaj pushtimit të Ukrainës.

Në një deklaratë të përbashkët, raporton Financial Times, SHBA, Britania e Madhe, Kanadaja, Franca, Gjermania, Italia dhe Komisioni Europian thanë se do të pengonin Bankën Qendrore të Rusisë të përdorte rezervat e saj të brendshme për të minuar sanksione më të gjera.

“Qeveria Putin po përjashtohet nga sistemi financiar ndërkombëtar”, tha një zyrtar i lartë amerikan, i cili shtoi se masat do të rezultonin në rënien e lirë të monedhës ruse.

Udhëheqësit thanë se do të përjashtonin disa banka ruse nga Swift, duke u siguruar që ato të jenë “të shkëputura nga sistemi financiar ndërkombëtar” dhe duke dëmtuar aftësinë e tyre për të vepruar. Ata gjithashtu u zotuan të godasin “pasaportat e arta” që lejojnë rusët e pasur të blejnë shtetësi si dhe të vendosin sanksione ndaj zyrtarëve dhe elitave pranë qeverisë.

Veprimi i përbashkët është një përshkallëzim në përgjigjen e perëndimit ndaj pushtimit rus të Ukrainës. “Ne do të kërkojmë llogari nga Rusia dhe kolektivisht do të sigurojmë që kjo luftë të jetë një dështim strategjik për Putinin”, thanë liderët në deklaratën e tyre të përbashkët.

Zyrtari i administratës së Biden tha se Putini e kishte kthyer Rusinë në një “paria globale ekonomike dhe financiare” me pushtimin e tij të Ukrainës.

Në një deklaratë të veçantë, presidentja e Komisionit Evropian Ursula von der Leyen tha se ajo do t’u propozonte liderëve të BE-së që ata të “paralizojnë asetet e bankës qendrore të Rusisë” në mënyrë që të ngrijnë transaksionet e saj dhe ta bëjnë të pamundur që ajo të likuidojë asetet e saj.

Josh Lipsky, drejtor i Qendrës Gjeoekonomike të Këshillit Atlantik, i cili më parë ka punuar në FMN, tha përpara veprimeve se goditja e Bankës Qendrore do të ishte një “lëvizje jashtëzakonisht e rëndësishme dhe e dëmshme” për ekonominë e Rusisë.

“Një Bankë Qendrore e G20 nuk është sanksionuar kurrë më parë. Ky nuk është Irani. Kjo nuk është Venezuela”, tha Lipsky.

Edward Fishman, një ish-zyrtar i SHBA-së, që tani punon në Qendrën për një Siguri të Re Amerikane, tha se mund të paraqesë një “goditje shkatërruese” për ekonominë ruse që do të eklipsonte rëndësinë e një ndalimi të Swift, raporton Financial Times.

Ndryshe, SHBA ka sanksionuar më parë vetëm bankat qendrore të Iranit, Venezuelës dhe Koresë së Veriut.