Pengjet bashkohen me familjarë, Trump i drejtohet Parlamentit: Agim historik i një Lindjeje të Mesme të re

Sot janë liruar të gjitha pengjet e gjalla izraelite që kanë qenë në duart e Hamasit prej tetorit të vitit 2023, në këmbim, Izraeli ka nisur t’i lirojë 250 palestinezë dhe mbi 1.700 të ndaluar tjerë, ndërkohë Presidenti i SHBA, Donald Trump, e nisi fjalimin në parlamentin izraelit në Jerusalem, Knesset, ku u prit me duartrokitje dhe festë.

“Vend i mirë, njëmend vend i mirë. Jemi mbledhur në një ditë gëzimi të thellë dhe shprese të madhe. Pas dy vjetëve të tmerrshëm në errësirë dhe robëri, 20 pengje guximtare po kthehen te familjet e tyre. Edhe 28 tjerë po vijnë në shtëpitë e tyre për të gjetur paqen në këtë vend të shenjtë. Armët kanë rënë në heshtje dhe rajoni është në paqe,” tha Presidenti Trump duke e konsideruar një agim historik të një Lindjeje të Mesme të re.

“Ky nuk është vetëm fundi i luftës, por fundi i një epoke terrorizmi. Ky është fillimi i një uniteti të madh dhe harmonie të qëndrueshme për Izraelin dhe të gjitha kombet e një rajoni që së shpejti do të jetë vërtet i mrekullueshëm. Unë e besoj këtë me gjithë zemër. Ky është agimi historik i një Lindjeje të Mesme të re.”

Ndërkohë në Ramallah të Gazës kanë arritur dy autobusë me të burgosurit palestinezë që janë të liruar nga burgjet izraelite. Nënat dhe baballarët janë parë duke qarë nga gëzimi pasi janë takuar me fëmijët e tyre. Një pjesë e mirë e tyre kanë pasur dënime me burgime të përjetshme.

Disa janë parë me plagë dhe kanë pasur vështirësi që të ecin, prandaj janë dërguar në spitalet e mbetura funksionale për t’u trajtuar.

Ndryshe, armëpushimi hyri në fuqi të premten si pjesë e një plani paqeje të ndërmjetësuar nga Presidenti i SHBA-së Donald Trump. Në këmbim të lirimit të pengjeve, Izraeli do të lirojë rreth 2.000 të burgosur palestinezë, përfshirë deri në 250 që janë dënuar me burgim të përjetshëm.