“Pengmarrësi dhe Ustai”/ Dy njerëzit më të papërgjegjshëm në Shqipëri, vazhdojnë përplasjen…

Ndonëse njëri President dhe tjetri Kryeministër, si Ilir Meta ashtu edhe Edi Rama vazhdojnë përplasjen si njerëzit më të papërgjegjshëm që vazhdojnë të jenë në Shqipëri. Fjalori që ata përdorën gjatë 72 orëve të fundit, jo që nuk është dëgjuar në Partinë Socialiste së cilës i takojnë, por tashmë kjo përplasje është bërë shumë e dëmshme edhe për shtetin.

Së fundi, Ilir Meta duke u mburrur me Partinë Socialiste, që sipas tij, ka kapacitete të jashtëzakonshme në fushën e politikës së jashtme, akuzon Edi Ramën se si Usta i Madh, do të vendos në krye të diplomacisë një kandidat, që do bëjë autoshkollën me kufijtë e Ballkanit Perëndimor.

E Ustai i Madh, i cili ç’është e vërteta nuk ja ka idenë për politikën e jashtme aq sa Ilir Meta pa lekë, i kthen përgjigje në çast Presidentit duke e quajtur pengmarrës të Kushtetutës.

“Mos prisni të merrem më me një pengmarrës të Kushtetutës në zyrën e Presidentit, i cili është katandisur në çizme rezervë e Doktorreshës së Shkencave.

Gjykata e re Kushtetuese do t’i japë fund kësaj maskarade, ndërsa vëmendja jonë do jetë e gjitha tek njerëzit e zero tek çizmet,” thekson Edi Rama përmes rrjetit social Twitter duke iu përgjigjur Ilir Metës.

Kjo ishte dhe përgjigja në deklaratën e Ilir Metës, kur ai duke e bërë shpikësin e politikës së jashtme, akuzon Edi Ramën që si Usta kërkon të mësojë gjeniun si të ndryshojë kufijtë e të gjithë Ballkanit Perëndimor

“Sot, në momente të rëndësishme të sfidave tona rajonale, Ministria për Europën dhe Punët e Jashtme e Shqipërisë nuk mund të kthehet në autoshkollë ku ustai i madh kërkon të mësojë “gjeniun” si të ndryshojë kufijtë e të gjithë Ballkanit Perëndimor. 
Partia Socialiste ka kapacitete të jashtëzakonshme në fushën e politikës së jashtme dhe Shqipëria ka shumë diplomatë të sprovuar, të cilët mund të vendosen në drejtimin e politikës sonë të jashtme, pa kaluar nga autoshkolla e ndryshimit të kufijve në gjithë Ballkanin Perëndimor. 
Shqipëria do jetë gjithmonë faktor paqe e stabiliteti në rajon. 
Shqipëria do ketë një lidership të besueshëm edhe në kryesimin e OSBE-së. SHQIPËRIA E PARA,” tha Ilir Meta.

Ndryshe, Shqipëria pas rënies së diktaturës, nuk ka njohur politikë të jashtme socialiste që ka lënë gjurmë për të mirën e vendit. Aq më pak Kosovës, për të cilën Ilir Meta dhe Edi Rama kanë hapur garën se cili është më patriot. Pengmarrësi dhe Ustai mund ta hapin garën për dëmet që i kanë bërë Kosovës ndonëse dihet fituesi sepse Edi Rama gjatë karrierës së tij politike nuk kishte poste dhe shumë gjëra në dorë, për t’ja kaluar Ilir Metës.