Kërkoi dorëheqjen e Saliut për 700 mijë € e Likes, për milionat e Lali Erit, Rama: Për çfarë arsye ta jap?!

Pas videos me Zv/Kryeministrin Ilir Meta ku Edi Rama me shpurrën e tij tha se po numëronte 700 mijë euro, ai organizoi revolucion, i vuri flakën vendit më 21 Janar 2011 dhe kërkoi dorëheqjen e Kryeministrit Sali Berisha. Sot, kur është vetë Kryeministër, gjysmën e qeverisë e ka në burg, Zv/Kryeministrin Arben Ahmetaj e akuzuar për miliona të vjedhur që po i ikë drejtësisë, dhe, së fundi edhe Kryetarin e Bashkisë, Erion Veliaj, për siç argumentoi vetë SPAK miliona euro të vjedhura, Kryeministri Edi Rama akuzon Prokurorinë e Posaçme se e mbylli Lali Erin në qeli pa gjyq dhe nuk sheh arsye që jo ai, por as Erioni të jap dorëheqje.

“U ekzaltuan nga arrestimi i Erionit dhe u turrën për të kërkuar dorëheqjen time. Jo vetëm oxhaku i vjetër i partisë së bufit të kënetës, por edhe mangallët e partiçkave, kanë vënë shishet poshtë, që kërkojnë dorëheqjen time. U deti kos edhe o burra të hidhemi tek Kryeministria,” tha Edi Rama në komunikimin e tij me qytetarin të pagëzuar “Sy m’Sy” dhe ndonëse kanë kaluar 24 orë nga arrestimi i Lali Erit vazhdon e flet pa mendje në kokë duke zhvlerësuar dhe vendimin e GJKKO.

“Marrja e kryetarit të Bashkisë së Tiranës për ta mbyllur pa gjyq në qeli për të lënë një qytet të tërë pa kokën që i kanë vënë mbi shpatulla, është një ngjarje tejet e madhe që nuk mund ta kaloj me ‘skam koment’.

Unë nuk do t’i mbaj më për vete opinionet e mija. Në të gjitha rastet që drejtësia do të bëjë punën e saj. Sot opinioni im është ky:

Drejtësia e re ka fituar vetëbesimin e nevojshëm. Mbështetja jonë do të vijojë njëlloj, por nuk ka pse mos shprehim edhe opinionet kritike, që do të ndihmojë edhe më tej konsolidimin e saj.

U bë 5 vite që flasin të tërë para e mbrapsht për këto që bën parakalimin para kamëerave tek stacionin e trenit, dhe vetëm PS forca që qeveris vendin, heshtim.

Heshtja jonë i ka ndihmuar shumë institucionet e drejtësi, deri këtu, por kuptojmë që u mungon kritika kontruktive.

Përballen sot me hosananë e një pjesë të publikut që me zor ka pritur të shohë pushtetarë të lidhur, ose sulme destruktive të asaj pjese të udhëhequr nga bufi i stërplakur dhe kua kua-të,” tha Edi Rama duke qarë hallin e fëmijës e Ajolës 6 vjeç që i arrestuan nënën në shtëpi dhe nuk ka se kush ta çoj në shkollë, duke harruar se kur ajo kërkohet për masë arresti, fëmija shkonte në shkollë ndonëse mamanë e kishte në Romë!

“I nisur nga një novelë, dorëzuar shkurtin e kaluar në SPAK që ka pjellë një roman 4000 faqe ku prokurorët dhe gjykatësit paraprakë kanë arritur që edhe nënën me fëmijën 6 vjeç ta lënë në Arrest shtëpie kur babanë e kanë çuar në qeli.

Kush e merr dhe e sjell këtë fëmijë nga shkolla, si i jepet për të ngrënë etj.

Kemi pasur edhe raste të tjera ku për 1001 arsye janë trajtuar ndryshe. Mungesa e uniformitetit që merren dhe trajtohen si kriminelët e kriminelëve Veliaj, Xoxe dhe fëmija 6-vjeç, ka një peshë të tillë që nuk duhet folur pa u zbardhur krimet që e paskan lënë Tiranën pa kryetar bashkie, pa gjyq. Flas për krimet e provuara, jo ata nga gojët e ndyra. Më thonë bëhu burrë e jep dorëheqjen. Për çfarë arsye ta jap?” tha njeriu që i kërkoi Sali Berishës të jap dorëheqje pasi e veproi ai dhe shpurra e tij se Likja i mori 700 mijë euro, dhe, jo gjykata, siç e kërkon sot!

Në fund, pasi nuk pa arsye për dorëheqje as të tij si Kryeministër që ka gjysmën e qeverisë në burg, Kryetarin e Bashkisë Erion Veliaj të akuzuar për vepra penale, Edi Rama nuk e pa të arsyeshme as dorëheqjen e Kryetares së Komisionit të Ligjeve dhe deputeten e PS, Klotilda Bushka, pasi dje SPAK bëri të ditur se po kryen hetime për kryerjen e veprës penale “Veprime që pengojnë zbulimin e së vërtetës”, në rastin e Lali Erit!

Ndryshe, sot Kryetari i Bashkisë, Erion Veliaj, është në qeli jo pa gjyq siç thotë shefi i tij, Edi Rama, por SPAK ka sqaruar se “caktimi i masës së sigurimit personal me karakter shtrëngues “arrest në burg”, parashikuar nga neni 238 i Kodit të Procedurës Penale, për shtetasin nën hetim Erion Veliaj, me detyrë, Kryetar i Bashkisë Tiranë, si i dyshuar për kryerjen e veprës penale të “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim (9 herë) dhe “Pastrimi i produkteve të veprës penale ose veprimtarisë kriminale”, parashikuar nga neni 260 e 25 dhe 287/2 i Kodit Penal,” thekson SPAK përmes njoftimit duke sqaruar se Kryetari i Bashkisë Tiranë, Erion Veliaj, përmes veprimeve konkrete të cilat kanë kulmuar me nënshkrimin e tij ka miratuar në çdo rast shpërndarjen e fondeve publike si edhe lejet e ndërtimit tek disa subjekte tregtare, të lidhur ngushtë me të, përfaqësuesit e të cilëve përmenden në njoftim.

Pasi dha detaje për procedurën hetimore të Erion Veliaj dhe veprave të tij kriminale, në fund Prokuroria e Posaçme thekson se po kryen hetime paraprake ndaj deputetes së Kuvendit të Shqipërisë, Klotilda Bushka.

“Prokuroria e Posaçme po kryen hetime paraprake ndaj deputetes së Kuvendit të Shqipërisë, shtetases K. B. Emri i kësaj të fundit është regjistruar në regjistrin përkatës të njoftimeve si person i dyshuar për kryerjen e veprës penale të “Veprime që pengojnë zbulimin e së vërtetës”, parashikuar nga neni 301 i Kodit Penal. Deri në këtë fazë konstatohet se ekzistojnë të dhëna konkrete të cilat të çojnë tek dyshimi i arsyeshëm se personi nën hetim K. B. ka kryer veprime aktive të kundërligjshme të cilat kanë interferuar me hetimin e organit procedues në lidhje me procedimin penal nr. 27 të vitit 2024.”