Për 85% që duan ndryshimin/ Basha në Delvinë: Angazhimi madhor i PD…
Kryetari i Partisë Demokratike, Lulzim Basha, duke u shprehur mirënjohës për çdo banor të Delvinës që iu bashkua shumicës absolute të 85 përqind të shqiptarëve të cilët duan ndryshimin, tha se angazhimi i tij madhor është t’ua kthejë mirënjohjen shqiptarëve me vepra konkrete për mirëqenien e tyre, kur PD të marrë drejtimin e vendit.
“30 qershori është nul dhe i pavlefshëm. Çdo produkt i tij është nul dhe i pavlefshëm,” tha Lulzim Basha para strukturave të PD në Delvinë duke shtuar se kjo ishte një datë që e vulosi Edi Ramën, edhe sipas raportit të OSBE/ODIHR, si një grabitës votash dhe një politikani që shkel Kushtetutën për të uzurpuar çdo pushtet.
Gjatë turit të tij të takimeve në jug të vendit ashtu si edhe në Delvinë lideri i opozitës shprehu shqetësimin e Partisë Demokratike për varfërimin e shqiptarëve për shkak të grabitjes së tyre nga qeveria.
“Një grusht klientësh bashkë me Edi Ramën dhe qeverinë e tij janë shndërruar në grabitës të çdo pasurie publike dhe të çdo burimi natyror të vendit. Ata janë shkaku i thellimit të varfërisë,papunësisë, mungesës së mundësive,” tha Basha duke i konsideruar klientët e Edi Ramës një grusht biznesmenësh grabitqarë që ndajnë paratë dhe pasuritë me njëri- tjetrin.
“Ekonomia dhe pasuritë e vendit janë në duart e këtyre pak njerëzve përreth Edi Ramës. Bregdetin ua ka grabitur qytetarëve dhe, me vendime speciale, ua ka dhënë oligarkëve që kanë ndërtuar në toka të vjedhura buzë detit,” tha Kryetari i Partisë Demokratike, Lulzim Basha, duke vlerësuar se braktisja e interesit publik për të pasuruar veten dhe një grusht biznesmenësh dhe kriminelësh, është një nga arsyet e refuzimit plebishitar të Edi Ramës më 30 Qershor.
