Për herë të parë në luftë, Ukraina: Rusia kreu një sulm me një raketë ndërkontinentale

Ukraina thotë se Rusia hodhi një raketë balistike ndërkontinentale gjatë natës duke shënjestëruar qytetin Dnipro, gjë që nëse konfirmohet, do të ishte hera e parë që Moska përdor një raketë të tillë në luftë.

Në një deklaratë të publikuar sot në aplikacionin e mesazheve Telegram, forcat ajrore të Ukrainës nuk saktësuan llojin e raketës, por thanë se ajo ishte lëshuar nga rajoni rus Astrakhan, i cili kufizohet me Detin Kaspik.

Në deklaratë thuhet se një raketë balistike ndërkontinentale u hodh në qytetin Dnipro së bashku me tetë raketa të tjera dhe se ushtria ukrainase rrëzoi gjashtë prej tyre.

Sipas zyrtarëve lokalë, dy persona u plagosën si pasojë e sulmit dhe një objekt industrial dhe një qendër rehabilitimi për personat me aftësi të kufizuara u dëmtuan.

Ndonëse fusha e veprimit të një rakete balistike ndërkontinentale e bën të duket e tepërt për t’u përdorur kundër Ukrainës, raketa të tilla janë të dizajnuara për të mbajtur koka bërthamore dhe përdorimi i njërës do të shërbente si një kujtesë rrëqethëse e aftësisë bërthamore të Rusisë dhe një mesazh i fuqishëm i përshkallëzimit të mundshëm.

Njoftimi për një sulm me një raketë të tillë u bë dy ditë pasi presidenti rus Vladimir Putin nënshkroi një doktrinë të rishikuar bërthamore që ul zyrtarisht pragun për përdorimin e armëve bërthamore nga Rusia. Ukraina të martën hodhi disa raketa amerikane me rreze më të gjatë veprimi dhe thuhet se ka hedhur të mërkurën raketa britanike në Rusi.

Ministria ruse e Mbrojtjes tha në një deklaratë të enjten se sistemet e saj të mbrojtjes ajrore rrëzuan dy raketa të prodhimit britanik “Storm Shadow”, gjashtë raketa HIMARS dhe 67 dronë. Njoftimi është pjesë e përmbledhjes së përditshme të ministrisë në lidhje me veprimet ushtarake në Ukrainë.

Deklarata nuk tha se kur ose ku saktësisht ndodhi sulmi ose çfarë synonin raketat. Ky nuk është njoftimi i parë publik i Moskës për rrëzimin e raketave Storm Shadow, pasi Rusia raportoi më herët se kishte rrëzuar disa mbi gadishullin e aneksuar të Krimesë.

Zhvillimet e raportuara ndodhin në një kohë kur lufta ka marrë një dimension ndërkombëtar në rritje me vendosjen e trupave të Koresë së Veriut për të ndihmuar Rusinë në fushëbetejë, një zhvillim që zyrtarët amerikanë thanë se nxiti ndryshimin e politikës së presidentit amerikan Joe Biden për të lejuar Ukrainën të përdorë raketa amerikane me rreze më të gjatë veprimi për të goditur objektiva në Rusi. Kremlini u përgjigj me kërcënime për përshkallëzim të konfliktit.

Presidenti Putin ka paralajmëruar më parë SHBA-në dhe aleatët e tjerë të NATO-s se lejimi i Ukrainës të përdorë armët perëndimore me rreze më të gjatë veprimi për të goditur territorin rus, do të thotë se Rusia dhe NATO janë në luftë. Doktrina e tij e re lejon një përgjigje të mundshme bërthamore nga Moska edhe ndaj një sulmi konvencional ndaj Rusisë nga çdo komb që mbështetet nga një fuqi bërthamore./VOA/