Për Kosovën, Engel: Mungon përkushtimi si ai administratës Clinton dhe Bush!
Kryetari i Komitetit të Dhomës së Përfaqësuesve për Marrëdhënie me Jashtë, Eliot Engel, tha se administrate aktuale amerikane duket se nuk e ka përkushtimin që kishin për Kosovën administratat Clinton dhe Bush.
“Zgjedhjet sapo janë mbajtur në Kosovë dhe Shtetet e Bashkuara tani duket se janë duke u larguar nga përkushtimi dypartiak që kemi pasur në administratat e kaluara, duke nisur me Clintonin, Bushin dhe të tjerët,” tha Engel duke rikujtuar edhe një herë mirënjohjen dhe falënderimin që kanë shprehur shqiptarët për popullin amerikan.
“Pavarësisht sa shumë mund të udhëtoni, ju nuk mund të gjeni kurrë një vend që i përshëndet amerikanët me aq gëzim, sikurse kosovarët. Unë kurrë nuk kam parë ndonjë vend që i do dhe i vlerëson amerikanët dhe është aq falënderues për atë që kemi bërë më 1999 për të parandaluar gjenocidin që po ndodhte para syve të Evropës. Andaj më thyhet zemra që, në njëfarë mënyre ua kemi kthyer shpinën atyre njerëzve”, është shprehur Eliot Engel.
Kjo deklaratë e Kryetarit të Komitetit të Dhomës së Përfaqësuesve për Marrëdhënie me Jashtë, Eliot Engel, pason atë të Ish-Sekretares amerikane të Shtetit, Madeleine Albright, se tani Shtetet e Bashkuara nuk janë duke ndihmuar sikur dikur në zgjidhjen e mospajtimeve mes Kosovës dhe Serbisë.
Madeleine Albright dhe Eliot Engel i kanë bërë këto komente gjatë një debati të organizuar nga Komiteti për Marrëdhënie me Jashtë i Dhomës së Përfaqësuesve, i cili u zhvillua përmes një videokonferene ku u diskutua për autoritarizmin, dezinformimin dhe qeverisjen gjatë krizës së pandemisë së koronavirusit.
Në debat kanë marrë pjesë edhe President i Institutit Nacinal Demokratik, NDI, Derek Mitchell, dhe President i Institutit Ndërkombëtar Republikan, IRI, Daniel Twining.
