Për shkak të koronavirusit janë anuluar 28 milionë operacione në botë
Në botë, për shkak të pandemisë së koronavirusit janë anuluar 28.4 milionë ndërhyrje kirurgjike, theksohet në një studim ndërkombëtar të grupit të kirurgëve “CovidSurg Collaborative” rezultatet e së cilit u publikuan sot.
“Duke u bazuar në ndërprerjen 12 javore të aktiviteteve spitalore për shkak të koronavirusit, është vërtetuar se në botë janë anuluar ose shtyrë 28.4 milionë ndërhyrje kirurgjike që ishin caktuar më parë.
Kjo ka shkaktuar pritjen më të gjatë pacientëve për zgjidhjen e problemeve të tyre shëndetësore,” theksohet në komunikatën e qendrës spitalore në qytetin francez Ren, i cili mori pjesë në këtë studim.
Studimi ndërkombëtar është kryesuar nga shkencëtarët e Universitetit në Birmingem, ndërsa rezultati është publikuar në revistën britanike mbi kirurgjinë British Journal of Surgery.
Studiuesit kanë mbledhur informacione nga 359 spitale në 70 shtete.
Sipas këtyre të dhënave që kanë shërbyer edhe për vlerësimin e situatës në 190 shtetet të goditura nga koronavirusi, çdo javë e ndërprerë e aktiviteteve spitalore ka shkaktuar anulimin ose shtyrjen e 2.4 milionë ndërhyrjeve kirurgjike.
Shumica e operacioneve që janë shtyrë janë ortopedike, deri sa një numër i vogël prej tyre janë onkologjike.
Grupi “CovidSurg” është një rrjet i 5.000 kirurgëve në 120 shtete të botës, për hulumtimin e ndikimit të koronavirusit në kujdesin kirurgjik.
