Për shkak të krizës në Turqi, rënie në bursat evropiane

Në bursat evropiane, indekset më të rëndësishme kanë shënuar rënie sot në mëngjes, dhe në pjesën më të madhe, për shkak të presionit nga rënia e çmimit të aksioneve të bankave nga kriza gjithnjë e më e madhe ekonomike në Turqi e cila ka tronditur besimin e investitorëve ndaj kreditorëve në këtë vend.

Indeksi panevropian STOXX600 në orën 9:30 ishte në minus për 0.4 për qind, dhe ra në nivelin më të ulët në tri javët e fundit.

Njëkohësisht, DAX-i i Frankfurtit ra 0.7 për qind, në 11.338 pikë, indeksi londinez FTSE 0.56 për qind, në 7.623 pikë dhe ai parisien CAC për 0.4 për qind, në 5.392 pikë.

Nga ata të sektorëve, humbjen më të madhe e ka pësuar indeksi i bankave në eurozonë, për 1.2 për qind, dhe është në nivelin më të ulët në gjashtë javët e fundit.

Për shkak të krizës ekonomike në Turqi aksionet e BBVA, Unicreditit dhe  BNP Paribas kanë rënë 0.9 – 2.6 për qind.

Aksionet e Bayer kanë rënë 10.4 %

Më së keqi kanë kaluar aksionet e Bayerit, duke rënë për 10.4 për qind, dhe është drejt përfundimit të ditës së saj më të keqe në 9 vitet e fundit.

Kjo kompani e madhe gjermane farmaceutike po shënon rënien e madhe të çmimeve të aksioneve  pasi që kompania amerikane Monsant, të cilën e ka blerë në qershor, është dënuar nga gjykata dhe duhet të paguaj dëmshpërblimin një bujku amerikan për shkak të glifosatit që është gjetur në produktet e tyre, e që është shkaktar i sëmundjes së tij nga kanceri.

Dukshëm ka shënuar rënie edhe çmimi i aksioneve të kompanisë ajrore Air France KLM, për 4.5 për qind, pas paralajmërimit të sindikatës së pilotëve të kësaj kompanie, për një grevë gjatë fundjavës nëse nuk rifillojnë negociatat me krerët e kompanisë.

Në bursën e Tokios indeksi Nikkei gjithashtu ka shënuar rënie për 2 për qind, në 21.857 pikë, që është edhe niveli i tij më i ulët në pesë vitet e fundit.