Për turizëm, MEPJ: S’kërkohet as testi COVID-19 dhe asnjë dokument tjetër

Me fillimin e sezonit turistik ndërsa shtetet anëtare të Bashkimit Europian vazhdojnë debatin se çfarë lloj regjimi do të aplikojnë për shtetet anëtare dhe joanëtare që nuk i detyrohen rekomandimit të KE për pasaportë vaksinimi, Ministria për Evropën dhe Punë të Jashtme e Shqipërisë, MEPJ, bënë të ditur se për të vizituar vendin tonë nuk kërkohet as testi COVID-19 dhe asnjë dokument tjetër i veçantë.

“Ministria për Evropën dhe Punët e Jashtme njofton të gjithë shtetasit shqiptarë dhe të huaj se për të vizituar Shqipërinë, nuk ka asnjë kufizim në hyrje, nuk kërkohet as Testi COVID-19 dhe asnjë dokument tjetër i veçantë,” thekson MEPJ përmes një njoftimi në rrjetin social Facebook.

Ndryshe, pavarësisht vendimit të Këshillit Evropian, shtetet anëtare të BE do ta trajtojnë individualisht regjimin me pasaportë të gjelbër vaksinimi, dhe një gjë të tillë në veçanti e kanë paralajmëruar ato vende me vartësi të madhe ekonomike nga turizmi.