Përball regjimit me aksion të fuqishëm opozitar, Berisha: Treni i PD nuk ndalet!

Kryetari i Partisë Demokratike, Sali Berisha, duke paralajmëruar sot një aksion të fuqishëm opozitar ai tha se përkundër të gjitha përpjekjeve qeveritare për ta ndalur, PD është e pandalshme në rrugën e objektivave të saj.

Ballkanin e Hapur e cilësoi si nismë antishqiptare ndërsa bazuar në protokollin e zbatuar, Berisha tha se në Beograd, Edi Rama u trajtua si vasal!

“Nëse sheh protokollet, ai është trajtuar si vasal. Të themi atë që është. Kjo nuk duhet të bëjë përshtypje, se ai është vasal. Vuçiç nuk ka nevojë ta shprehte këtë. Por ajo që dua të them, Ballkani i Hapur është në çdo aspekt, një nismë antishqiptare. Aleksandër Vuçiç, një serbomadh sa Millosheviçi, sa Gjorgjeviçi, po e përdor Ballkanin e Hapur në çdo aspekt. Po e përdor për t’iu kundërvu Nismës së Berlinit, për të vendosur hegjemoninë serbe në Ballkan dhe influencën ruse. Po e përdor për të shkatërruar prodhimin në Shqipëri dhe Maqedoni, pasi asnjë rregull nuk është përcaktuar në tregun e lirë. Po e përdor për të dejonizuar politikisht Prishtinën, por kjo i dështoi. I dështoi sepse Perëndimi e ka të qartë se kufiri i tij në Ballkan është kufiri me Kosovën.

E përdor në rrafshin psikologjik me doktrinën e vjetër se kemi të bëjmë me dy shqiptarë, shqiptarci dhe albanci, këta të fundit janë të mirë dhe në Shqipëri, kure shqiptarci janë të këqinj dhe janë në Kosovë. Kjo është përdorur me dekada nga Beogradi. Rama është bërë argument kryesor i kësaj dogme,” tha Sali Berisha.

Në konferencëne përjavshme i pashmangshëm ishte vendimi i Edi Ramës për rikthimin e basteve, ku Kryetari i PD tha se bixhozxhiu më i madh i Shqipërisë dhe Ballkanit, Olsi Rama, pas lajmeve për Ervis Martinin, do bëhet mbreti i basteve

“Dy persona kanë qenë të njohura në industrinë e basteve, Ervis Martini. Ai, askush nuk merr vesh të vërtetën, por e vërteta është se fill pas zhdukjes, eliminimit apo largimit të tij, bastet u rikthyen për t’i marrë Olsi Rama. Ai ka qenë njeriu në hije i basteve. Këto nuk janë pa lidhje me njëra-tjetrën. Prandaj lëvizjet e fundit të tij janë grusht shteti i pjesshëm. Ato janë institucione shumë të rëndësishme, policia, SHISH apo pastrimi i parave. Sot mbreti i basteve bëhet Olsi Rama legalisht. Unë nuk jam për industrinë e mëkateve dhe bixhozit, jam penduar që janë lejuar gjatë qeverisjes sime dhe nuk do lejohen, sepse janë burim fatkeqësish. Tani ky i legalizon, ky që nuk tha gjë për to. Masivisht thuhet se vëllai i tij është mbrapa,” tha Berisha duke shtuar:

“Kjo e call-center dhe implikimi i Olsi Ramës është bërë publike. Nuk është një gjë e re. Këtë e sollën autoritetet gjermane. Tani, Edi Rama, dyshon se ky lehtësoi hetimin gjerman apo nxori sekretin, këtë nuk e di. E vërteta është se bixhozxhiu më i madh i Shqipërisë dhe Ballkanit është Olsi Rama dhe për pasojë familja Rama. Kjo nuk është sekret. Ky është gjithçka.”

Ndërkohë për aksionin opozitar, ai tha se ka takuar dhe liderin e Partisë së Lirisë, Ilir Meta dhe pritet një protestë e fuqishme.

“Jam takuar me zotin Meta. Nuk kemi fiksuar datë për protestë. Kemi rënë dakord për një aksion të fuqishëm opozitar për përballje me këtë regjim, që po shtrëngon çdo ditë e më shumë monizmin e tij në vend, vjedhjet dhe plaçkitjet e qytetarëve shqiptarë dhe sundimin e krimit. E theksova dhe e theksoj sërish, zhvillimet e dy ditëve të fundit kanë qenë zhvillime që në një shtet normal të kujtojnë grushte të pjesshme të shtetit. Ti je kryeministër, por nuk mund të heqësh drejtorin e Policisë së Shtetit pa motive të forta dhe publike. E heq atë, vetëm për qëllime të mbrapshta, kur nuk tregon motivet. Ti je kryeministër, por nuk mund të zëvendësosh drejtorin e SHISH pa shkarkuar drejtorin. Atë e kanë nisur në shkollë pa afat. Paska qenë i pashkolluar ky Helidoni. Ka muaj të tërë në SHBA. Ti je kryeministër, por nuk mund të shkarkosh drejtorin e pastrimit të parave pa dhënë shpjegime. Në mungesë të shkaqeve të shkarkimit, çdo qytetar ka të drejtë të besojë se kanë qenë arsye personale. Sepse klani Rama është i përfolur në të gjithë aferat,” tha Kryetari i Partisë Demokratike, Sali berisha, duke përfunduar:

“PD është e pandalshme në rrugën e objektivave të saj. Ajo natyrisht mbetet e hapur. Por besoj se treni i saj është absolutisht i pandalshëm. Gjatë një viti u bënë të gjitha përpjekjet për ta ndalur, por ai vetëm sa rriti. Kështu që nuk ndalet treni i PD-së.”