“Përfitime në kullën pas TOB”, Berisha: Trillime, ftoj Edi Ramën të anulojë lejen!

Trillime, përpjekje për të shuar flakët e inceneratorit që nuk ekziston, i ka quajtur sot Kryetari i Partisë Demokratike, Sali Berisha, akuzat për përfitime në kullën pas TOB ndërsa ftoj Kryeministrin Edi Rama të anulojë lejen e ndërtimit.

Për aferën e inceneratorëve, Kryetari i Partisë Demokratike, tha se po vlon një luftë brenda llojit dhe nuk mund të katandiset në një aferë familajre të Arben Ahmetaj, ndërsa PD, theksoi ai, e ka denoncuar, do e denoncojë dhe nuk e pranon.

“Shpifje dhe trillime të mirëfillta nga kuzhina Fuga-Veliaj.

Së pari, e gjithë përpjekja është të krijojnë një zhurmë për të shuar flakët e djegësit të Tiranës që nuk ekziston. Pse e them këtë?

Gjatë qeverisjes së PD, Sali Berisha nuk ka dhënë asnjë leje për asnjë kullë. Plani që ka miratuar Këshilli Kombëtar i Rregullimit të Territorit në vitin, në mos gagoj në vitin 2012, ose diçka, ka qenë për ndërtimin e ndërtesave me lartësi 6-8 katë në të gjithë territorin e Tiranës.

Ata që përpiqen të më atribuojnë mua, ata janë shpifarak të mjerë, së pari.

Së dyti, në qoftë se Edi Rama paska dhënë leje për Shkëlzen Berishën, duhet të kesh humbur çdo mendje, duhet të bëhesh shpifës i kalibrit të Ymer Bazes, apo Carlo Bollinos që të nxjerrësh shpifje të tilla.

Megjithatë, e ftoj Edi Ramën të anulojë menjëherë lejen.

Së treti, PD del sot me deklaratën e saj në të cilën paraqet çështjet e thella ligjore që ekzistojnë për atë ndërtim, me pronarët, me respektimin e vendimit të gjykatave, etj.

Pra, nuk bëhet PD, ta ketë të qartë të qartë cilido. Nuk i dikton dot kush agjendën asaj, përveçse vet, sikundër nuk kërkon t’u diktojë të tjerëve.

Pra, të përpiqesh të mbulosh në shpifje e trillime se kulla nuk është përmend, apo këto pse del, këto janë gjëra të mjera, të dështuara, nuk kanë asnjë lidhje. Apo fajin e ka Saliu për kullat? Unë nuk kam dhënë asnjë kullë, dhe nuk do të jipja asnjëherë, pikë.

Përveçse, po të zgjidhej një zonë, se dua të jem i hapur, po të zgjidhej një zonë e pandërtuar, ku mund të ndërtohej një kuartier i ri që shpreh arkitekturën bashkëkohore, të cilën unë sigurisht nuk e kundërshtoj,” tha Sali Berisha duke shtuar se ndonëse vapa e gushtit ra, flakët e inceneratorit të Tiranës që nuk ekziston bëhen gjithnjë e më përcëlluese.

“Të dhëna autentike, zyrtare, origjinale faktojnë se Erion Veliaj është autori më kryesor së bashku me Edi Ramën i vjedhjes së shekullit me inceneratorin e Tiranës.

Këto të dhëna të cilat disponohet plotësisht edhe nga Prokuroria Speciale dëshmojnë se, jo një, por gjashtë herë Ministria e Financave fillimisht Shkëlqim Cani dhe më vonë Arben Ahmetaj kanë refuzuar kërkesën e përsëritur prej gjashtë herësh të ndërtimit të djegësit të Tiranës, si një kërkesë krejtësisht e papërballueshme nga pikëpamja financiare, gjë të cilën e konfirmon me përgjegjësi të plotë para një viti edhe Kontrolli i Lartë i Shtetit.

Janë të gjitha datat: 28 shtator 2016, 27 nëntor, 7 dhjetor i po të njëjtit vit, 27 dhjetor të 2016 në të cilat Ministria e Financave ka shprehur disaprovimin e saj të plotë për djegësin e Tiranës. Përveç këtyre, data 1 shkurt, 21 shkurt, pra janë edhe këto data të kërkesave dhe të refuzimit të Ministrisë së Financave për projektin e vjedhjes së shekullit që është Inceneratori i Tiranës.

Në ndryshimin e qendrimit, të cilin unë nuk e mbroj, nuk pranoj se ndryshimi i qendrimit të Ministrisë së Financave duhet të ndodhte, por në ndryshimin e qendrimit, rol vendimtar ka patur falsifikimi dhe mashtrimi i Erion Velliajt, se bashkia do të përballonte shpenzimin për fondin prej 91 milionë eurosh.

Në fund, Kryetari i Partisë Demokratike duke konstatuar se këtu po vlon një luftë brenda llojit dhe nuk mund të katandiset në një aferë familjare të Arben Ahmetajt, PD e ka denoncuar, do e denoncojë dhe nuk e pranon.

“Ky mashtrim i Erion Veliajt ka së pari aspektin penal se është marrë, është paraqitur si vendim i Këshillit Bashkiak, në një kohë kur ky vendim nuk ka ekzistuar kurrë.

Së dyti, Erion Velia ka dërguar shkresë mikut të vet, Alqi Bllako me të cilën koordinonte. A e keni parë ju një video që qarkullon, ku Erioni dhe Alqi i thurin lavde vjedhjes së tyre njëri tjetrit në mënyrë të shpifur. Pra, Alqi Bllako ku i thotë se është marrë vendimi i Këshillit të Qarkut, në një kohë kur bashkitë e tjera nuk ishin pyetur asnjëherë.

Por, thellohet edhe më tej.

Ka një moment në Komisionin e Miratimit dhe dhe Shpalljes së Koncensionit. Në këtë komision kryetarja e saj Ballgjini, që duket duket se ishte një titullare në Ministrinë e Mjedisit kërkon që të mos miratohet koncensioni, meqënëse nuk ekziston vendimi i Këshillit Bashkiak, por vetëm firma e Erion Veliaj, e cila nuk përfaqësonte Këshillin Bashkiak për financimin.

Dy të deleguarit e Erion Veliajt nën diktatin e tij garantojnë komisionin se është tërësisht mendimi i këshillit, dhe firma e Veliajt është dhënë pasi është marrë vendimi i këshillit.

Pra, përveç kësaj, duke patur për ndërmarrje të vetën djegësin e Tiranës, Erion Veliaj lejon fillimin e punimeve, madje edhe të pagesave për djegësin e Tiranës pa u firmosur leja e ndërtimit nga Këshilli Kombëtar i Rregullimit të Territorit.

Pra, ky e tejkalon dhe Edi Ramën në veprime.

Këshilli Kombëtar i Rregullimit të Territorit është mbledhur më 17 maj, në një kohë kur Erion Veliaj ka filluar punimet në djegësin e tij më datën 6 prill, dhe ka filluar njëkohësisht disbursimin e fondeve po në këtë periudhë.

E vërteta, se duhet të themi të vërtetën këtu, Këshilli i Rregullimit të Territorit, Këshilli Kombëtar, madje ka vendosur nja dy tri kushte këtu për fillimin e punimeve këtu, siç është rregulli, rregulli është strandart, ka vendosur kushte standarte.

Anjëri nga kushtet nuk është përfillur, dhe punimet kishin filluar një muaj e gjysmë më parë nga Lal Djegësi në sipërmarrjen e tij. Të gjitha këto faktojnë se Erion Veliaj dhe Edi Rama me Engjëll Agaçin, Artur Metanin janë katër përgjegjësit më kryesorë dhe pronarët e djegësit të Tiranës.

Pse unë përfshij këtu Agaçion dhe Metanin? Po, janë përgjegjës plotësisht, sepse ata kishin detyrë kushtetuese dhe ligjore të bllokonin këto procedura, të bllokonin dhënien e 8 pikëve kompanisë në letra Zoto-Mërtiri, në realitet Veliaj- Rama –Agaçi, sepse ajo kompani nuk ishte e regjistruar dhe nuk ekzistonte, sepse duhej të mbetej në sekret të plotë kompania e Veliajt dhe Ramës.

Theksoj edhe njëherë, koncensioni prej 128 milionë eurosh, pra koncensioni i madh nuk mund kurrë të mbyllej pa një shpallje sipas ligjit shqiptar dhe ligjit ndërkombëtar në organet e mëdha botërore të mediave. Si rregull, Financial Times, portalin e Bankës Botërore dhe media të tjera. Kurse Erion Veliaj ka bërë çdo hap me falsitet vetëm e vetëm për të vrapuar drejt këtij krimi të shëmtuar.

Unë në këtë rast do shtroj një pyetje: midis atij që vepron, midis atij që insiston dhe firmos në mënyrë të përsëritur dhe kriminale për këtë vepër, dhe atij që reziston, por në fund pas gjashtë përpjekjesh dorëzohet, cili është kryefajtori?

Nuk e them këtë për të mbrojtur absolutisht Arben Ahmetajn, jo. E them këtë, se askush nuk mund ti hedhë hi syve kujt të paraqesë përgjegjës atë që refuzoi gjashtë herë, dhe jo atë që insistoi gjashtë herë atë që mashtroi, firmosi në emër të Këshillit Bashkiak, dha garanci për 91 milionë euro pa patur asnjë tagër, përveç mashtrimit, firmosi në emër të bashkive të qarkut, pa u pyetur asnjëherë bashkitë e tjera.

Pra, çfarë po vlon këtu? Këtu po vlon jë luftë brenda llojit, dhe kjo nuk mund të pranohet. PD i ka denoncuar të gjithë ëta, këtu i kam prej vitesh. Prej një viti e gjysmë janë dërguar të gjithë në SPAK, Arben Ahmetaj, Erion Veliaj, Edi Rama, Engjëll Agaçi e me rradhë me rradhë. Janë dërguar, janë paditur në SPAK. Po, po.

Por nuk mund të pranojmë që të lëshohen urdhërarreste për bashkëshorten dhe partneren e Arben Ahmetajt, në mënyrë që të katandiset kjo aferë në një aferë familajre të Arben Ahmetajt. Qëllimi i Erion Veliajt dhe i të tjerëve këtu. Jo vetëm i Erion Veliajt ç’është e vërteta, po e kam zbërthyer edhe herë tjetër këtë punë,” tha Kryetari i Partisë Demokratike, Sali Berisha, duke përfunduar:

“Nuk është aferë familjare, afera e djegësave, vjedhja e shekullit, secili ka përgjegjësinë e vet, dhe ata që thonë se ky po mbron këtë , nuk prombroj asnjëri. Që të gjithë janë dërguar nga PD pranë institucionit të akuzës, por ndërhyrjet në këtë institucion bëjnë pastaj që kjo aferë të përdoret për luftë klanesh brenda partisë.

Këtë PD e ka denoncuar, do ta denoncojë, nuk e pranon dhe nuk do ta pranojë.”