Performanca e liderit amerikan, shqiptarët ndër aprovuesit më të mëdhenj në botë, 75 % Kosovë dhe 72 % Shqipëri, janë dakord me Trump
“Rendi global i pushtetit po zhvendoset”. Gjermania po zëvendëson Shtetet e Bashkuara të Amerikës si fuqia globale e vlerësuar në botë, thekson sondazhi i fundit të këtij viti nga Gallup.
Po çfarë mendojnë shqiptarët sipas këtij sondazhi? Të dhënat tregojnë se 72 % e shqiptarëve e aprovojnë performancën e liderit të SHBA, Trump, kundrejt 15 % të tyre që nuk janë dakord për vendimet e marra. Sakaq 13 % e të intervistuarve kanë refuzuar që të përgjigjen. Krahasuar me një sondazh të një viti më parë, shkalla e miratimit dhe e pëlqyeshmërisë ka rënë me 4 % tek shqiptarët. Populli më i “dashuruar” me performancën e Donald Trump duket se janë shqiptarët e Kosovës. Ata kryesojnë në rajon me 75 % pro SHBA-ve, ndjekur nga shqiptarët e Shqipërisë, Maqedonia me 45 %; Bosnja e Hercegovina me 28 %, Mali i Zi me 25 % dhe e fundit, Serbia me 16 % .
Nivelet më të ulëta të aprovimit të vendimeve dhe performancës si president të Donald Trump e kanë vendet anëtare të NATO-s, si dhe Rusia dhe vendet e tjera Lindore që kanë praninë e trupave amerikane në territoret e tyre.
Sipas raportit, mendohet se shpallja e programit nga Trump “Amerika e Para” është një ndër faktorët kyç që ka ndikuar në përgjigjet e njerëzve dhe kjo pa marrë në konsideratë edhe vendosjen së fundmi te sanksioneve për produktet e importit në Kinë, Turqi.
Raporti i Gallup tregon sa dhe si vlerësohet lideri i SHBA Trump, si krahasohet me vlerësimet e tjera të lidershipit global dhe cilat janë implikimet për 2018, bazuar në anketat në 134 shtete në botë.
Gjetje sipas zonave:
– Zelanda e Re, Australia dhe Singapori panë një rekord rënie të aprovimit ndaj liderit të SHBA, më e ulëta ndër vite, me rreth -30%
– Aprovimi më i madh shihej në shtetet afrikane
– Ka pasur rënie të aprovimit në Europë, sidomos në vendet anëtare të NATO-s
– Vetëm një shtet, Izraeli ka një rritje dy shifrore të pëlqyeshmërisë dhe aprovimit të vendimeve të lidershipit amerikan./Monitor/
