Performancë e dobët, tërmet në Dogana dhe Tatime…

Pas një performance të dobët në mbledhjen e të ardhurave në dy muajt e parë të këtij viti, Edi Rama vendos për ndryshime të rëndësishme tek Tatimet dhe Doganat.

Drejtoresha e Përgjithshme e Tatimeve, Vasilika Vjero është larguar nga detyra dhe në vend të saj është emëruar, Enton Duro, që aktualisht është Drejtor i Drejtorisë së Pronës dhe Pasurisë pranë Ministrisë së Financave.

Nga Dogana është larguar Drejtoresha e Përgjithshme, Belinda Ikonomi, e cila është emëruar Zv/ministre e ekonomisë dhe financave.

Ajo është zëvendësuar në detyrë nga Arlind Gjokuta, që deri tani mbante postin e drejtorit të Drejtorisë kundër parandalimit të Pastrimit të Parave.

Ministria e Financave nuk është prononcuar ende për këto ndryshime.

Ndryshe, grumbullimi i të ardhurave buxhetore po has në vështirësi këtë fillimvit, teksa shihet se ritmet e rritjes gjatë janar-shkurt ishin vetëm 1.7 për qind më shumë se fakti i një viti më parë. Ngërçi në arkëtime ka përfshirë burimet kryesore të grumbullimit të të ardhurave, tatimet dhe doganat, arkëtimet nga të cilat ishin 0.2 për qind më të ulëta se dymujori i vitit 2018.