Përfundon afati i dënimit, GJKKO liron nga burgu Ish-Drejtorin e RTSH, Thoma Gëllçi

Lirohet nga burgu Ish-Drejtori i Përgjithshëm i Radio Televizionit Shqiptar, Thoma Gëllçi.

Vendimi është marrë sot nga Gjykata e Posaçme për Korrupsionit dhe Krimit të Organizuar, GJKKO, pasi pranoi kërkesën e avokatit, Dorian Matliaj, për lirimin e tij për shkak se i ka përfunduar afati i dënimit. Ndërkohë çështja ndaj tij do të zhvillohet në Apel ku Gëllçi kërkon pafajësi.

Ndryshe, Thoma Gëllçi dhe tre punonjësit e tjerë të këtij institucioni u arrestuan nga SPAK, me dyshimin se kishin kryer shkelje ligjore në një proçedurë prokurimi, shkelje këto të kualifikuara në elementët e veprës penale “Shpërdorimi i detyrës”, parashikuar nga neni 248 i Kodit Penal”.

Sipas SPAK, Gëllçi dhe tre punonjësit e televizionit kanë abuzuar “Në proçedurën e prokurimit “Proçedurë e hapur”, me objekt “Blerje pajisje për kanalin RTSH Agro”, me nr. REF-90011-10-16-2018, me fond limit 86. 908 550, 00 lekë”.

Në 2 Qershor 2022, GJKKO e dënoi me dy vite burg Ish-Drejtorin e Përgjithshëm të RTSH, Thoma Gëllçi. Duke përfituar nga gjykimi i shkurtuar, Thoma Gëllçit i është ulur dënimi në 1 vit e 4 muaj burg. Ndërkohë, për tre të akuzuarit e tjerë, anëtarë të Komisionit të Vlerësimit të Ofertave, Julian Tapia, Ervin Muraj dhe Alban Malaveci, GJKKO vendosi dënimin me nga një vit burg.

Gjithashtu, si dënim plotësues, Gjykata e Posaçme i hoqi Gëllçit dhe tre vartësve të tij të drejtën për të mos ushtruar funksione publike për 5 vite.