Përfundon numërimi i votave në Kosovë, KQZ publikon rezultatet e kandidatëve për deputetë
Komisioni Qendror i Zgjedhjeve i Kosovës ka publikuar rezultateve për kandidatët për deputetë si dhe ka përditësuar rezultatin paraprak të zgjedhjeve të 9 Shkurtit pas përfundimit të numërimit të 100% të votave.
Votat për deputetë tashmë mund t’i gjeni KETU ndërkohë zëdhënësi i KQZ-së, Valmir Eelezi, ka sqaruar:
“Ju njoftojmë se pas numërimit të votave të kandidatëve për deputetë dhe verifikimit të rezultateve të subjekteve politike nga formularët e rezultateve të plotësuar në vendvotime, proces i cili është zhvilluar dhe po vazhdon në Qendrat Komunale të Numërimit, në platformën elektronike https://rezultatet2025.net janë publikuar rezultatet për subjektet politike dhe kandidatët për deputetë. Në këto rezultate janë përfshirë të dhënat nga 2.290 (90.41%) nga 2.533 vendvotimet e numëruara deri më tani në Qendrat Komunale të Numërimit dhe se rezultatet e vendvotimeve tjera do të publikohen në mënyrë progresive.
Po ashtu, në këto rezultate nuk përfshihen rezultatet e votave me kusht, votave të personave me nevoja të veçanta dhe votave nga votimi jashtë Kosovës, numërimi i të cilave do të bëhet gjatë ditëve në vazhdim në Qendrën e Numërimit dhe Rezultateve.”
Përpunohen 100% votat e vendvotimeve, KQZ përditëson rezultatin paraprak
Komisioni Qendror i Zgjedhjeve ka përpunuar 100 për qind të rezultateve për partitë politike të dala nga zgjedhjet e 9 shkurtit në Kosovë nxjerrë nga 2.533 vendvotime sa kishte gjithsej në ditën e zgjedhjeve.
Sipas këtyre rezultateve paraprake, Vetëvendosje ka marrë 40.80 për qind të votave apo 342.281 vota, Partia Demokratike e Kosovës ka marrë 22.3 për qind, apo 184.811 vota, Lidhja Demokratike e Kosovës ka marrë 17.63 për qind, apo 147.888, koalicioni AAK–Nisma ka marrë 7.46 për qind, apo 62.588 vota, dhe, Lista Srpska 4.8 për qind apo 36.124 vota.
Ndërkohë liderët e këtyre partive dhe kandidatët për Kryeministër kanë marrë këto vota:
Albin Kurti, lider i Lëvizjes Vetëvendosje dhe kandidat për kryeministër – 259.532 vota
Bedri Hamza, kandidat për kryeministër nga Partia Demokratike e Kosovës – 150.294 vota
Memli Krasniqi, lider i Partisë Demokratike të Kosovës – 85.293 vota
Lumir Abdixhiku, lider i Lidhjes Demokratike të Kosovës dhe kandidat për kryeministër – 109.202 vota
Ramush Haradinaj, lider i Aleancës për Ardhmërinë e Kosovës dhe kandidat për kryeministër – 37.752 vota
Zllatan Elek, lider i Listës Srpska – 9.354 vota.
Ndryshe, certifikimi i këtyre rezultateve nga KQZ-ja pritet të bëhet vetëm atëherë kur të përmbyllet në tërësi numërimi i votave, fillimisht atyre për deputet, pastaj votave nga diaspora, votave me kusht e atyre të personave me nevoja të veçanta.
