Përfundon raundi i dytë i takimit trepalësh, Vuçiç largohet nga godina e BE

Në Bruksel ka përfunduar raundi i dytë i bisedimeve trepalëshe midis liderëve të Kosovës dhe Serbisë, Albin Kurti dhe Aleksandar Vuçiç, me ndërmjetësimin e përfaqësuesve të Bashkimit Evropian.

Paraprakisht, pas raundit të parë, shefi i diplomacisë së BE-së, Josep Borrell, dhe i dërguari i posaçëm i BE-së për dialogun, Miroslav Lajçak, kanë biseduar ndaras me Kurtin dhe Vuçiçin.

Presidenti i Serbisë u largua nga godina e BE-së pa iu drejtuar mediave, raporton RFE ndërsa shefi i Zyrës së Qeverisë së Serbisë për Kosovën, Petar Petkoviç, u tha gazetarëve se Vuçiç do të vazhdojë qëndrojë në Bruksel dhe se do t’i drejtohet opinionit publik nesër, më 19 gusht.

“Ajo që është e rëndësishme është që ne luftuam për paqe, për stabilitet, për zgjidhje kompromisi,” tha Petkoviç.

Ndërkohë mediat serbe raportuan se Presidenti i Serbisë ka ftuar serbët nga Kosova për një takim i cili do të mbahet të dielën në Pallatin “Serbia” në Beograd.

Në takim janë të ftuar të gjithë përfaqësuesit politikë dhe institucionalë të serbëve të Kosovës, zyrtarë të Listës Srpska, të gjithë kryetarët serbë të komunave, kryetarët e rretheve, si dhe drejtorët e spitaleve.

Ndryshe, kjo ishte hera e parë që brenda një dite u mbajtën dy takime trepalëshe në kuadër të dialogut për normalizimin e raporteve midis Prishtinës dhe Beogradit. Raundi i parë i takimit trepalësh u mbajt pak pas orës 10:30, dhe ky raund u pasua me takime të ndara të delegacioneve me zyrtarët e BE-së.

Në godinën e Bashkimit Evropian ku është zhvilluar dialogu, raporton RFE, ka qëndruar edhe i dërguari i Shteteve të Bashkuara për Ballkanin Perëndimor, Gabriel Escobar, ndonëse pala amerikane nuk merr pjesë në dialog, por SHBA mbështet plotësisht përpjekjet e BE-së në procesin e normalizimit të marrëdhënieve ndërmjet Serbisë dhe Kosovës.

Ky ishte takimi i tretë midis Kurtit dhe Vuçiqit në Bruksel, pasi në qershor dhe korrik të vitit 2021, dy takimet kishin përfunduar pa ndonjë rezultat.