Pas takimit në Bruksel, Vuçiç: Pa sukses! Kurti: S’pranojmë kushtëzim me Asociacion!

Me përfundimin e takimit në Bruksel, mes Kryeministrit të Kosovës, Albin Kurti, dhe Presidentit të Serbisë, Aleksandër Vuçiç, me ndërmjetësuesit e BE-së, Përfaqësuesin e Lartë për Politikë të Jashtme dhe Siguri, Josep Borrell, dhe të dërguarin për dialogun Kosovë-Serbi, Miroslav Lajçak, Vuçiç, tha se bisedimet me Kurtin përfunduar pa sukses ndërsa Borrell sqaroi se Kurti nuk e pranoi propozimin e BE-së për zbatimin e Marrëveshjes për normalizimin e marrëdhënieve me Serbinë, por kërkoi formalizimin e njohjes de facto të Kosovës nga Serbia.

Por ndryshe nga Borrell dhe Vuçiç, Kryeministri i Kosovës, Albin Kurti, ka sqaruar se nuk ka mundur të pranojë kompromisin me kushtëzimin e Serbisë për formimin e Asociacionit të komunave me shumicë serbe.

“Ne të gjithë i kemi propozimet tona, shqiptarët i kanë të tyret, ne i kemi tonat. Në fund, ne si Serbi e kemi pranuar propozimin e kompromisit të BE-së. Kurti nuk ka dashur ta pranojë. Është e qartë se Kurti, thjesht, i shmanget formimit të Asociacionit të komunave me shumicë serbe. Ky është thelbi i gjithçkaje. Serbia nuk ik nga detyrimet e saj,” tha Aleksandar Vuçiç pas takimit pa saktësuar “kompromiset”.

Me këtë rast Presidenti i Serbisë tha se në takim u diskutua edhe për mundësinë e mbajtjes së zgjedhjeve të reja në veri të Kosovës.

“Nëse kryetarët shqiptarë të komunave japin dorëheqje, do të japë gjithçka nga vetja, që komuniteti serb të marrë pjesë në procesin e ri zgjedhor,” tha Presidenti i Serbisë ndonëse serbët lokal që para fillimit të takimit kanë dhënë kërkesa të padiskutueshme.

Po cili ishte ky kompromis! Përfaqësuesi i Lartë i BE-së, Josep Borrell, duke rikonfirmuar e kryeministri i Kosovës, Albin Kurti, nuk e pranoi propozimin e BE-së për zbatimin e Marrëveshjes për normalizimin e marrëdhënieve me Serbinë, tha se kërkoi që të formalizohet njohja de facto e Kosovës nga Serbia.

“Sot, me kryeministrin Kurti dhe presidentin Vuçiq, kam tentuar që të gjejmë zgjidhje për një rrugë përpara, bazuar në propozimin tonë. Fatkeqësisht, pas një takimi të gjatë, kryeministri Kurti nuk ka qenë i gatshëm që të ecë përpara me fillimin e një procesi të besueshëm për themelimin e Asociacionit të komunave me shumicë serbe në Kosovë. Në vend të kësaj, ai ka insistuar që të formalizohet njohja de facto si hap i parë,” tha Josep Borrell.

Albin Kurti: S’pranojmë kushtëzim me Asociacion

Por Kryeministri i Kosovës, Albin Kurti, ka sqaruar se nuk ka mundur të pranojë kompromisin mes propozimit të tij me sekuencë dhe kushtëzimit të Serbisë për formimin e Asociacionit të komunave me shumicë serbe.

“Nuk jemi në prillin e vitit 2013 kur në dhomë ndodheshin Baronesha Ashton, këshilltari i saj Cooper dhe kryeministrat e asaj kohe, Hashim Thaçi e Ivica Daçiç. S’është marrëveshja e vitit 2013. Qartë Neni 10 i marrëveshjes bazike thotë se duhet të zbatohen të gjitha marrëveshjet e mëhershme të cilat të dialogut në Bruksel të cilat janë të obligueshme dhe valide. Janë 39 sosh gjithsej. Nuk mundet nga neni 10 nga 39 marrëveshje të përzgjidhet një e të vendoset sikur qerrja para kuajve. Të bëhet edhe thelb edhe parakusht. Një kushtëzim të tillë unë nuk e kam pranuar,” tha Kryeministri i Kosovës, Albin Kurti, duke shprehur keardhje që Lajçaku e ka pranuar një kushtëzim të tillë.

“Kushtëzimin që e ka pranuar Lajçaku, e ka bërë në cenim të funksionit të tij si lehtësues dhe ndërmjetësues. E unë s’mund ta pranoja një të tillë duke cenuar Kosovën, kryeministër i së cilës jam. Edhe ky dokumenti i vjetër që paraqet dokumentin e kushtëzimit që një herë Asociacioni e pastaj shohim, e kemi në dorë e s’kemi qenë në dijeni që ka pasur një të tillë. Ne kemi bërë një propozim. Secilin nen nga 11 sosh të Marrëveshjes, secilën fjali dhe pikë jam i gatshëm e i interesuar që të zbatojmë një orë e më parë në plotëni,” tha Albin Kurti duke shtuar se Marrëveshja e Ohrit mes Kosovës dhe Serbisë e ka njohjen de facto.

“Ta vendosësh Asociacionin në qendër është në kundërshtim me Marrëveshjen Bazike që e kemi pranuar e lansuar më 27 shkurt dhe që është bërë pjesë e konkluzioneve.”

Ndryshe, Kurti dhe Vuçiç zhvilluan paraprakisht takime të ndara me ndërmjetësuesit e dialogut, shefin e diplomacisë evropiane, Josep Borrell, dhe të dërguarin për dialogun Kosovë-Serbi, Miroslav Lajçak.

Pas këtyre takimeve, Përfaqësuesi i Lartë i BE-së, Josep Borrell, përmes rrjetit social X u shpreh se është koha për fillim të zbatimit serioz të marrëveshjes në rrugën e normalizimit ndërmjet dy vendeve.

“Sot do të shohim nëse janë gati të marrin përgjegjësi,” u shpreh Josep Borrell.

Albin Kurti e Aleksandar Vuçiç u takuan sot në Bruksel, pas më shumë se katër muajsh.