Përfundon takimi në Gjenevë, BE: Irani nuk mund të ketë armë bërthamore! Irani: Bisedime serioze!

Pas takimit që u zhvillua në Gjenevë mes ministrave të jashtëm evropianë dhe delegacionit iranian, vijnë sinjale pozitive për vazhdimin e dialogut dhe përpjekjeve për të shmangur një përshkallëzim të konfliktit në rajon.

Zv/Presidentja e Komisionit Evropian, Kaja Kallas, pas përfundimit të takimit tha se përshkallëzimi rajonal nuk i sjell dobi askujt dhe për këtë arsye duhet të mbajmë diskutimet të hapura.

“Të dyja palët ranë dakord të diskutojnë çështjet bërthamore dhe temat më të gjera,” tha Kajaj Kallas ndërsa Sekretari i Jashtëm i Mbretërisë së Bashkuar, David Lammy, ishte i prerë:

“Qëndrimi ynë ishte i qartë, Irani nuk mund të ketë armë bërthamore. Ne i bëjmë thirrje Iranit që të vazhdojë bisedimet me Shtetet e Bashkuara. Ky është një moment shumë i rrezikshëm dhe është jashtëzakonisht i rëndësishëm që të mos ketë përshkallëzim rajonal të konfliktit mes Iranit dhe Izraelit,” tha David Lammy.

Ndërsa Ministri i Jashtëm i Iranit, Abbas Araghchi, i përshkroi bisedimet e sotme në Gjenevë me përfaqësuesit e Mbretërisë së Bashkuar, Gjermanisë, Francës dhe Bashkimit Evropian si serioze dhe dinjitoze.

Në një deklaratë pas takimit, shefi i diplomacisë iraniane tha se Irani është gati të rishqyrtojë qasjen diplomatike dhe mbështet vazhdimin e bisedimeve pas ndërprerjes së agresionit.

“Ne jemi gati për takime të reja me vendet e E3 dhe Bashkimin Evropian në të ardhmen e afërt,” tha Abbas Araghchi duke hap derën për diplomaci të mëtejshme pasi të gjithë pjesëmarrësit në bisedimet e sotme në Gjenevë, të mbajtura për të ndaluar përshkallëzimin e konfliktit midis Iranit dhe Izraelit, theksuan rëndësinë e vazhdimit të dialogut dhe parandalimit të përhapjes rajonale të konfliktit.