Përgjegjësia e Peshkaqenit!

nga Bardh Spahia

Në vitin e 9-në në pushtet, Edi Rama pranoi sot korrupsionin në shëndetësi dhe tha se përgjegjësit do përgjigjen para ligjit.

Partia Demokratike ka denoncuar sistematikisht gjatë viteve të rregjimit të Ramës korrupsionin në shëndetësi, që nis me kontratat koncesionare abuzive për paratë e taksapaguesve të vendit më të varfër të Europës.

Ideuesit dhe firmëtarët kanë qenë Edi Rama dhe ministrat e tij, të njëjtët që firmosën edhe për uljen e sigurisë së barnave që hyjnë në Shqipëri, duke hequr standardin e vendosur nga qeveria e Partisë Demokratike për pranimin vetëm të barnave te rregjistruar në vendet e BE apo vende te tjera perendimore.

Për arsye korruptive, me firmë të bashkëpunëtorëve të ngushtë të Edi Ramës, në Shqipëri futen barna nga vende jashtë BE që nuk kanë standardin e kërkuar. Ky ka qenë modeli abuziv i viteve të rregjimit të Edi Ramës, një kosto e përditshme për shëndetin e shqiptarëve.

Edi Rama nuk mund të sillet sikur sapo ka zbritur nga një planet tjetër, e sikur korrupsioni në shëndetësi nuk ka lulëzuar në nivelet më të larta të sistemit edhe me bekimin e tij. Tenderat me ofertë të pakërkuar e sekretë me fitues të paracaktuar mbajnë vulën e Edi Ramës dhe të bashkëpunëtorëve të tij të afërt.

Pra përgjegjësia nuk mund të jetë e peshqve të vegjël, por e peshkaqenit të madh në krye të qeverisë.