Përgjegjësia individuale, vetëm kur PS është në pushtet!

nga Agim Popoci

Arrestimet e fundit nga Prokuroria e Posaçme lidhur me çështjen e inceneratorëve dëshmojnë se shumë reforma mund ti bëhen sistemit të drejtësisë por kur Partia Socialiste është në pushtet, ajo funksionon me mendësinë e vitit 1945!

Shumë krime janë bërë që nga dita e pushtimit komunist, dhe nuk kanë munguar as 19 vite tjera të pushtimit socialist gjatë periudhës 31 vjeçare të tranzicionit, dhe çuditërisht gjithmonë predikohej përgjegjësia individuale. Por kjo nuk ndodhte kur Partia Demokratike ishte në pushtet sepse, sipas PS, gjithmonë fajet i kishte Saliu!

Meqë 31 vjet tranzicion nuk janë pak, kanë ndodhur ngjarje të ngjashme ku në periudhën 12 vjeçare për shkelje të njejta ligjore të një polici, komisioneri zgjedhor, prokurori, gjyqtari, deputeti ose ministri është akuzuar Sali Berisha, por kjo nuk ka ndodhur edhe gjatë 19 viteve të qeverisjes socialiste kur u akuzuan vetëm individët kudo qofshin ata në rangun shtetëror.

Kështu për manipulimin e zgjedhjeve në vitin 1996 u akuzua dhe akuzohet Sali Berisha ndonëse komisionerët socialistë kontribuan në masën më të madhe që procesi zgjedhor të çrregullohet; Por, kur në pushtet erdhi PS, si në vitin 2001 kur manipulimi shkoi në makabritet ashtu dhe në përgjimet e BILD ku u konfirmuan shitje-blerjet e votave dhe kontrolli politik i manipulimit të zgjedhjeve të vitit 2015 e 2017 deri tek Kryeministri, para togave të zeza përfunduan ca komisionerë që zbatuan urdhërat dhe fajin nuk e kishte vetëm “saliu socialist”!

Pse dolën Ilir Meta dhe Edi Rama të palagur nga këto histori, pavarësisht që megafonët qeveritarë flasin për përgjegjësi individuale, nuk e shfajësojnë Sali Berishën nëse është i implikuar në vitin 1996, por e drejta duhet ta thoshte fjalën e saj për këto dy raste flagrante të vjedhjes zgjedhore dhe sot do kishim Metën dhe Ramën si dy Kryeministra që u prangosën për vjedhjen e votës dhe jo drejtues të shtetit shqiptar!

Ngjashëm ka ndodhur dhe me dy rebelimet komuniste që për fat të keq përfunduan me viktima! Për vitin 1997 u fajësua dhe fajësohet nga PS, ekskluzivisht Sali Berisha, madje ndikimit të propagandës komuniste iu nënshtruan edhe ca budallenjë të mbledhur përreth Lulzim Bashës, pas fjalës që nxorri nga goja Luli i Edi Ramës, duke i rënë vizën faktit se ky vend në këtë vit të zi kishte Kryeministër, ministra të Financave, Punëve të Brendshme dhe Mbrojtjes, pa ardhë te policët, ushtarët, tatimorët që janë quajtur dhe quhen veglat e Saliut!

Kështu ndodhi edhe në vitin 2011! Pse u dha me zë e figurë duke vjedhur Zv/Kryeministri Ilir Meta me ministrin Dritan Prifti të qeverisë së Sali Berishës, fajet i kishte Saliu, dhe me 21 Janar u sulmuan institucionet shtetërore nga mbështetësit e Partisë Socialiste, ku ngelën të vrarë 4 persona!

Në çdo vend normal, për keq qeverisje fajtori kryesor është kreu i qeverisë dhe ky mund të ishte argumenti i vetëm që mund ti referohej opozita socialiste kur kërkonte dorëheqjen e Saliut, por kur një rast i ngjashëm i ndodhë kësaj bande socialiste antishqiptare, përgjegjësia nuk është e Kryeministrit! Kështu nuk ndodhi kur një polic vrau një të ri për kokërr të qefit, me arsyetimin se ai nuk ndaloi ndërsa ishte ora policore për shkak të pandemisë. Përveç përgjegjësisë, që iu var në qafë policit vrasës, askush nuk fajësoi Edi Ramën, siç ndodhi me Saliun në vitin 1997 ose 2011, madje as ministrit të Brendshëm, Sandër Lleshaj, i cili dha dorëheqje, as morale dhe as politike, por u detyrua të largohet vetëm pas protestave të shumëta që cenonin kolltukun e Kryeministrit!

Saliu u fajësua edhe kur ndodhi Gërdeci dhe ngelën të vrarë 26 persona! Partia Socialiste e akuzoi Sali Berishën sepse baxhanaku i tij punonte në kompaninë që bënte demontimin e armëve dhe çdo euro që u përfol lidhur me tenderat abuziv me këtë kompani u ndërlidhën me Sali Berishën duke mos përfillur faktin madhor se kjo ngjarje tragjike ndodhi vetëm tre ditë para anëtarësimit të Shqipërisë në NATO! Po, kjo tragjedi mund të ndodhte nga pakujdesia e një punëtori në këtë uzinë të paligjshme demontimi, por më të interesuar që kjo të ndodhte, përveç socialistëve që edhe sot shohin ëndërra me Paktin e Varshavës, ishin dhe rusët e serbët, sepse Aleanca Veriatlantike në bregdetin shqiptar nënkuptonte dhe më pak prezencë të këtyre regjimeve kriminale!

Po çfarë ndodhi kur ra tërmeti dhe jetë të humbura kishte sa dyfishi i Gërdecit dhe sërish ishte dora e shtetit! Pallatet në shumicën e rasteve ishin shembur për shkak të kushteve teknike të ndërtimit, që janë konfirmuar nga institucionet që drejton Edi Rama! Pse nuk dha dorëheqje Kryeministri Edi Rama kjo nuk e shfajëson Sali Berishën që lejoi përveç se ndërtimin e paligjshëm të një uzine demontimi në Gërdec ashtu dhe lejimin e banimit ndër vite të qytetarëve në një zonë ushtarake, por e detyron Ramën i cili i referohet përgjegjësisë individuale që ta tërheq akuzën!

Dhe, në fund, CEZ, vjedhja e Thesarit dhe Inceneratorët! Filmat socialistët me abuzimet e CEZ dhe lumi me akuza ndaj Sali Berishës nuk do të kishin vend as në HEC-in e madh që po bënë Edi Rama në Dibër. Saliut iu shtua edhe Xeni, dhe çuditërisht askush nuk e zuri në gojë fjalën “përgjegjësi individuale”. Por kjo nuk ndodhi kur në dy qeverisje socialiste u vjedh Thesari i Shtetit. Në rastin e parë, për floririn u fajësua një fshatar i Kërrabës ndërsa në rastin e dytë një punonjës që na e paska për ves kumarin, ama në asnjë mënyrë Kryeministri; Madje në rastin e fundit edhe kur u tentua të fajësohet një socialist i rangut të lartë ndonëse nuk ishte kreu i qeverisë, Guvernatori i Bankës Shqipërisë, Ardian Fullani, përveç pafajësisë mori dhe dëmshpërblimin për vuajtjet e shkaktuara.

Për ti vënë kapakun e fatit të një vjedhje kur në pushtet janë socialistët është rasti me inceneratorët! Përkundër faktit se vjedhjet janë kryer bazuar në dokumentet e firmosura deri tek Kryeministri Edi Rama, për 86 milionë eurot e abuzuara deri më sot nga buxheti i shtetit, deri më sot në pranga kanë përfunduar vetëm ministri i Mjedisit Lefter Koka dhe Sekretari i tij i Përgjithshëm aktualisht deputet socialist, Alqi Bllako.

Pse SPAK-u i Ramës prangos Alqi Bllakon, kjo mund të ekzaltoj Lulzim Bashën por që drejtësia të vjen në vendin e duhur, Kryeministri Edi Rama, përveç dorëheqjes, duhet ta ndajë qelinë me Lefter Kokën!

Në këtë mënyrë shqiptarët dhe jo vetëm, mund të kuptojnë pse Saliu akuzohet që lejoi ndërtimin pa leje të shtëpive nga të ardhurit në Tiranë, që propaganda socialiste dhe ajo e Lulzim Bashës e anatemon si “tokë e xanun”, dhe pse Edi Rama nuk ka faj pse lejoi kanabizimin e gjithë tokës e cila u bë “e xanun” nga shteti dhe u mbjellë me drogë nga shërbëtorët e saj, për tu mbyllur si çështje me përgjegjësi individuale nga ca fshatarë, policë, shefa të tyre dhe së fundi ministrin e Brendshëm, Saimir Tahiri.

Po, do ta kuptojnë, por sa vlenë kjo kur shqiptarët deri më sot nuk deshtën apo ulën kokën për të kërkuar përgjegjësi individuale penale edhe kur socialistët nuk ishin në pushtet?!

Apo, ç’e do kur më të lehtë e kishin ta nxjerrin nga goja pa tru: Fajin e ka Saliu!