Përgjigje Beogradit, Osmani: Në Kosovë kurrë më nuk do të ketë policë dhe ushtarë të Serbisë!
Në territorin e Kosovës kurrë më nuk do të ketë policë dhe ushtarë të Serbisë! Kështu iu përgjigj Presidentja e Kosovës, Vjosa Omsani, kërcënimit të sotëm të kryeministres së Serbisë, Ana Brnabiç, se janë duke shqyrtuar kthimin e ushtrisë serbe në Kosovë.
“Kërcënimi i hapur për agresion policor e ushtarak nga ana e Serbisë dëshmon se në atë shtet vazhdon mendësia hegjemoniste. Kjo duhet të refuzohet e kundërshtohet qartë nga e gjithë bota demokratike, e cila i dha goditjen më të fuqishme kësaj mendësie pikërisht në vitin 1999,” shprehet Vjosa Osmani duke shtuar se plagosja e mbrëmshme e një pjesëtari të Policisë së Kosovës është veprim kriminal dhe i orientuar kundër rendit kushtetues e sovranitetit të Kosovës si dhe sulmet ndaj gazetarëve, dhe autorët e këtyre krimeve, urgjentisht të sillen para drejtësisë.
Për kërcënimin e Drejtorit të Zyrës për Kosovë në Qeverinë e Serbisë mbrëmë, dhe atë të sotmin që doli nga goja e Kryeministres serbe, Presidentja e Kosovës kishte një përgjigje të qartë:
“Në territorin e Republikës së Kosovës kurrë më nuk do të ketë policë dhe ushtarë të Serbisë! Ëndrra hegjemoniste e Serbisë nuk do të jetësohet kurrë!”
Ndryshe, sot e pyetur për deklaratën e Drejtorit të Zyrës për Kosovën, Petar Petkoviç, se Serbia po shqyrton kthimin e 1000 ushtarëve serbë në veri të Kosovës, bazuar në Rezolutën 1244 të KS OKB, Brnabiç ndezi sërish gjakrat që u krijua bindja se ishin qetësuar, meqë nuk kishim të bëjmë me njësi speciale të Policisë së Kosovës në veri të armatosur deri në dhëmbë, siç gënjeu mbrëmë në mesnatë Petkoviç, por kot nuk janë serbë:
“Jam shumë e shqetësuar. Vështirë ishte të fleje gjumë mbrëmë. Kurti të gjithëve na solli në prag të luftës, si shqiptarët ashtu dhe serbët. Por nuk e bënë këtë vet.
Kemi një sjellje injoruese të partnerëve, dhe në BE. Të cilët nuk reagojnë. Keni KFOR-in dhe Euleksin, që nuk bëjnë punën e tyre, as bazuar në Marrëveshjen e Kumanovës. Ata nuk i mbrojnë serbët as në veri dhe as në jug të lumit Ibër. Çdo ditë shohim shkelje të Marrëveshjes së Kumanovës dhe Brukselit,” tha Ana Brnabiç duke mashtruar jo vetëm veten por dhe opinionin e gjerë serb se edhe mund të kthehen forcat serbe në Kosovë, aty ku NATO është përgjegjëse për sigurinë dhe bazuar në Rezolutën 1244 të cilën zyrtarët serbë gjithmonë e kanë në maje të gjuhës:
“Besoj se sot Presidenti Vuçiç do jep më shumë informacione lidhur me këtë çështje. Jemi afër vendimit që bazuar në Rezolutën 1244 të kërkojmë kthimin e forcave tona në Kosovë. Sepse atje serbët janë të kërcënuar. Duke përfshirë dhe fëmijët në kopshte,” tha Kryeministrja e një shteti që ndonëse ka humbur luftën dhe është larguar nga toka kosovare 23 vite më parë, nuk e dinë se çfarë është Rezoluta e Kombeve të Bashkuara e aq më pak, fëmijët dhe kopshti, por vetëm vrasja dhe vetëm vrasja e joserbëve!
