Përgjigje Cakajt, PD: Ja pse opozita s’ka përgjegjësi…

Pas dërdëllitjeve rilindase të Zv/ministrit të Jashtëm, Gent Cakaj, ku vjen dhe në konkluzionin se Raporti i OSBE-ODHIR ishte kritik për opozitën ndërsa procesi zgjedhor ka qenë i rregullt, reagon Partia Demokratike përmes Sekretarit të Përgjithshëm, Gazment Bardhi, duke theksuar se Raporti nuk mund të ishte për opozitën, pasi ndërkombëtarët nuk monitorojnë opozitën, por evidentojnë qartësisht përgjegjësinë e qeverisë për të garantuar zgjedhje të lira e të ndershme.

Gazment Bardhi sqaroj me këtë rast Gent Cakajn dhe atë që e ka urdhëruar, se nuk është përgjegjësi e opozitës pse KQZ ka shkelur ligjin, pse gjyqtarët e Kolegjit Zgjedhor ishin nën presionin e qeverisë apo pse punonjësit e administratës u shantazhuan.

“Për herë të parë në historinë e vëzhgimit të zgjedhjeve nga OSBE/ODIHR nuk specifikohet që zgjedhjet ishin demokratike. Për herë të parë specifikohet se veprime dhe sjellje të qeverisë, institucioneve të tjera përfshi gjykatën dhe prokurorinë, kanë qenë tërësisht në kundërshtim me ligjin. Për këtë nuk mund të jetë përgjegjëse opozita. Opozita nuk ka asnjë përgjegjësi pse KQZ ka shkelur ligjet e shtetit, pse gjyqtarët e Kolegjit Zgjedhor kanë qenë nën presionin e qeverisë, pse punonjësit e administratës u shantazhuan dhe kërcënuan. Raporti skanon të gjithë shtetin privat që ka ndërtuar Edi Rama,” tha Gazment Bardhi duke dhënë dhe arsyet pse Raporti nuk mund të ketë qenë më shumë për opozitën:

“Opozita kërkon vetëm dënim të kriminelëve, siç dëshmuan dosjet “184” dhe “339”. Rama jo vetëm që nuk është distancuar nga hajdutët e zgjedhjeve, por kryehajdutin e Dibrës e ka marrë në mbrojtje, duke e bërë kryetar të administrimit zgjedhor. Raporti nuk mund të ketë qenë më shumë për opozitën, siç u shpreh zëdhënësi i Ramës, pasi raporti nuk është për të monitoruar opozitën. Raporti nuk ka nevojë për interpretime, është i qartë dhe evidenton qartësisht përgjegjësinë e qeverisë për të garantuar zgjedhje të lira e të ndershme.”