Përgjigje Edi Ramës, Basha: Spitalet në kolaps sepse nuk heq dorë nga vjedhja…
Pas video-përgjigjes së Kryeministrit mbi “të vërtetën” e Komitetit Teknik të Ekspertëve, ka reaguar Kryetari i Partisë Demokratike, Lulzim Basha, dukekonstatuar se Edi Rama ka humbur çdo kontroll mbi pandeminë dhe spitalet janë në kolaps sepse ai nuk heq dorë nga vjedhja me inceneratorë e koncesione.
“Rama ka humbur çdo kontroll mbi pandeminë. Kemi testimet më të ulëta në Europë, numrin më të ulët të mjekëve dhe spitalet në kolaps vetëm sepse ai nuk heq dorë nga vjedhja me inceneratorë e koncesione,” thekson Kryetari i PD, Lulzim Basha, në reagimin e tij përmes rrjetit social Twitter duke përfunduar:
“Pasi shkatërroi ekonominë tani ai po shkatërron jetën dhe shëndetin e njerëzve.”
Ndryshe, pas deklaratës së Kryetarit të Partisë Demokratike, Lulzim Basha, se Komiteti Teknik i Ekspertëve është fasadë e Edi Ramës dhe nuk thotë të vërtetën për shifrat e koronavirusit, ka reaguar Komiteti duke bërë dhe politikë. Përkundër vendimeve absurde që publikoheshin nga Edi Rama, Komiteti sot u mundua të bind Bashën dhe opinionin publik se nuk është fasadë e askujt, por përbëhet nga profesionistë të fushës, që po i shërbejnë qytetarëve shqiptarë në këtë kohë të vështirë të pandemisë së koronavirusi ndërsa i bënë thirrje Lulzim Bashës që të tërheqë akuzat.
Por jo gjithçka mbaroi me kaq! Sot ishte Kryeministri Edi Rama që akuzoi për shpifje Kryetarin e PD, Lulzim Basha, ndërsa publikoi jetëshkrimin e ekspertëve që përbëjnë këtë Komitet duke e shoqëruar dhe me një video.
