Përgjigje Edi Ramës/ Pas tërmetit, Lulzim Basha: Ja plani ynë me 3 pika!

Pas tërmetit tragjik të 26 Nëntorit, Kryetari i Partisë Demokratike, Lulzim Basha, me rastin e vizitës së radhës në qytetin e Durrësit, sot nga lagjja numër 7 konstatoi për fat të keq se gjendja është e mjerueshme, banorët pohojnë se nuk kanë marrë asnjë ndihmë dhe nuk e dinë a mund të rrinë apo jo brenda,  ndërsa shpalosi planin e opozitës me 3 pika, në kushtet e gjendjes së emergjencës.

“Po mbushet java dhe prioritare është ndihma, ne mbështesim çdo masë që merret për të ndihmuar dhe po bëjmë çfarë të mundemi ne përmes vullnetarëve tanë. Është koha për veprime urgjente, konkrete dhe të mirëkoordinuara. Unë mbrëmë pata takim me ekspertët më të mirë që ka vendi. Kemi 500 specialistë gati për të dhënë kontributin e tyre vullnetar,” tha Lulzim Basha duke shtuar se vlerësimi i banesave mund të mbarojë për 10 ditë ndërsa bëri të ditur edhe Planin e opozitës me tre pika për t’iu ardhë në ndihmë banorëve.

“Së pari, organizim i 500 inxhinierëve në mënyre vullnetare për vlerësimin e gjendjes së banesave, vlerësimi me urgjencë dhe ndarje në banesa të banueshme apo të pabanueshme dhe së treti, të përdoren fuqitë që ka qeveria për të anuluar 150 mln dollarë të planifikuara për 10 oligarkët, tu anulohen kontratat dhe këto të destinohen për tu ardhur në nevojë këtyre banorëve.”

I pyetur për thirrjen dhe ftesën e Edi Ramës për bashkëpunim, Lulzim Basha tha se nuk është koha as për shfaqje as për fotografi, as për teatër: “Koha tani nuk kërkon poza, as teatër, gjendja është e mjerueshme, ndaj në emër të opozitës e përsëris se mbështesim çdo përpjekje për tu ardhur në ndihmë banorëve dhe nga ana tjetër po bëjmë çfarë kemi ne në dorë për të ndihmuar, nuk është koha as për shfaqje as për fotografi, as për teatër. Tani është koha për veprime të mirëkoordinuara urgjente që të vlerësohet gjendja e banesave dhe t’iu garantohet strehim njerëzve.”