Përgjigje Grenellit, Raportuesja për Kosovën në PE: Taksa është hequr!

Raportuesja e Parlamentit Evropian për Kosovën, Viola von Cramon, i është kundërpërgjigjur sonte kërkesës së Të dërguarit të Presidentit amerikan, Donald Trump, ambasadorit Richard Grenell për heqjen e plotë të taksës dhe reciprocitetit ndaj Serbisë.

Derisa Ambasadori Grenell kërkoi heqjen e tarifës ndaj mallrave serbe, eurodeputetja gjermane ia ka përkujtuar atij se një gjë e tillë ka ndodhur tashmë.

“Ndoshta është e re për të, por tarifat janë hequr nga Qeveria në detyrë dhe kryeministri Albin Kurti,” sqaron Cramon përmes rrjetit social Twitter duke shtuar se nuk ka qenë e nevojshme rrëzimi i qeverisë në kohë pandemie.

“Nëse dikush është i interesuar për udhëheqjen e dialogut, ai/ajo ka mund të fillojë me Qeverinë në Kosovë, në çdo kohë. Nuk ka nevojë ta rrëzosh atë në krizë të pandemisë,” thekson Cramon