Përgjigje “gruas” së Bilalit, Presidenca: Lekët e vjedhura kursejë për të paguar avokatët!

Pas deklaratës së kryeministrit Edi Rama se Ilir Meta dhe Sali Berisha duan të shpërbërë Reformën në Drejtësi, ka reaguar Presidenca përmes Zëdhënësit Tedi Blushi duke theksuar se Ilir Meta i qëndron besnikërisht Reformës në Drejtësi të bërë me 140 vota në Parlament, ndërsa këshillon “gruan” e Bilalit që lekët e vjedhura t’i kursejë për të paguar avokatët mbrojtës, kur të japë llogari para drejtësisë.

“Drejtësinë koreanoveriore të “gruas” së Bilalit, shqiptarët e kanë provuar për 50 vite, ndaj çdo certifikatë të “zonjës Bilali”, do ta hedhin në koshin e plehrave.

Ilir Meta i qëndron besnikërisht Reformës në Drejtësi të bërë me 140 vota në Kuvend, falë këmbënguljes së Tij kur ishte Kryetar i Kuvendit dhe këtë e dinë mirë të gjithë shqiptarët.

Drejtësinë e re, që se kapi dot me Kushtetutë, “gruaja” e Bilalit e kapi me ligje antikushtetuese, që vazhdon t’i miratojë dhe sot,” thekson Presidenca duke shtuar se Edi Rama nuk duhet të ketë merak se më 25 prill do ta marrë vlerësimin e merituar nga mbarë populli i Shqipërisë.

“Drejtësia e pavarur do vijë vetëm nga vota e lirë dhe e shenjtë. Kush prek votën e lirë do t’i pritet dora bashkë me thonjtë, që kanë kapur për fyti shtetin dhe drejtësinë.

“Gruaja” e Bilalit më kot harxhon para me lobistë për deklarata, certifikata dhe sondazhe të rreme. Bën mirë, që lekët e vjedhura t’i kursejë për të paguar avokatët mbrojtës, kur të japë llogari para drejtësisë,”thekson Presidenca në reagimin e saj përmes rrjetit social Facebook duke përfunduar:

Mos e provoko popullin e 2 Marsit se është shumëfishuar në një vit falë zullumeve të shtuara edhe në kohë pandemie!”

Ndryshe, duke komentuar Marrëveshjen e firmosur dje në mes të PD dhe LSI, Kryeministri Edi Rama tha se është pjesë e planit për të lidhur Lulin me zinxhirin e Monikës për llogari të Saliut dhe të Ilirit dhe pastaj sigurisht ose për të marrë pushtetin dhe për të shpërbërë reformën në drejtësi ose për të marrë kokën e Lulit.