Përgjigje KQZ-së, PD kundër votimit elektronik në zgjedhjet e vitit 2025
Duke ju përgjigjur kërkesës së Komisionit Qendror të Zgjedhjeve, KQZ, Partia Demokratike shprehet kundër propozimit për votimin elektornik në zgjedhjet e vitit 2025 në dy qarqe, Elbasan dhe Durrës, ndërsa argumenton se në zgjedhjet lokale të 14 majit 2023 ku në dy bashki, Elbasan dhe Kamëz, u aplikua votimi elektronik u konstatuan parregullsi që cenuan integritetin e procesit.
“Implementimi i pjesshëm i këtij projekti, krahas disa avantazheve dhe suksesit të pjesshëm solli edhe një seri problematikash të cilat jo vetëm e cënuan rëndë procesin, por edhe minuan në mënyrë serioze besimin e publikut dhe të forcave politike në të.
Pamjet filmike të operatorëve të sistemit të cilët përkundër kujdesit për mbarëvajtjen teknike të makinerive të votimit elektronik shkelën ligjin për të mbivendosur interesin partiak, duke votuar vetë në emër dhe për llogari të zgjedhësve të cilët nuk ishin aty ndërkohë që kjo përbën shkelje të Kodit Zgjedhor dhe vepër penale, dëshmojnë veprime që u konsumuan në prezencë të komisioneve të qendrave të votimit dhe ende sot mbeten të pahetuara si nga ana juaj ashtu edhe nga ana e organeve të drejtësisë të cilët duhet të vigjëlojnë mbi procesin zgjedhor,” thekson Partia Demokratike duke folur dhe për pamundësinë e verifikimit të votës dhe anulimit të saj:
“Mungesa në zbatim e garancive që ligji u jep zgjedhësve për të verifikuar votën dhe anuluar atë, mungesa e mekanizmave që garantojnë verifikim të thelluar dhe transparencë, gjithashtu minuan besimin e zgjedhësve, subjekteve zgjedhore dhe publikut në një proes që kërkon besim.”
Në kushtet kur:
“Ende nuk është bërë një transparencë e plotë lidhur me problematikat që kanë karakterizuar këtë proces në dy zgjedhjet pararendëse;
Në mungesë të mekanizmave efikas të adresimit të problematikave të konstatuara;
Si dhe presionin e një kohe të pamjaftueshme për një implementim efikas të kësaj teknologjie në zgjedhjet e ardhshme,” Partia Demokratike shpreh mosdakordësinë për propozimin e KQZ-së për zbatimin e votimit elektronik në zgjedhjet parlamentare të vitit 2025.
Ndryshe, ditë më parë Partia Socialiste i ka kthyer përgjigje Komisionit Qendror të Zgjedhjeve në lidhje me votimin elektronik, duke i kërkuar që përveç Durrësit dhe Elbasanit të përfshihet edhe Tirana, si qarku më i madh.
Duke argumentuar se votimi elektronik do të sillte lehtësira jo vetëm në procesin e votimit por dhe në shpalljen e rezultatit përfundimtar, Partia Socialiste që nuk bënë dot zgjedhje të lira dhe të ndershme as në Asamblenë e saj të partisë, jep propozime në letër që çuditin dynjanë:
“Nëse nga ana juaj shihet e pamundur përfshirja e tre qarqeve në votimin elektronik, për shkak të kohës që keni në dispozicion deri në dekretimin e dates së zgjedhjeve për Kuvendin e Shqipërisë, ju propozojmë që të miratoni si qark të vetëm, qarkun Tiranë, ku do të zhvillohet votimi elektronik!”
