Përgjigje Kryeministrit, Basha: 75 mln € për mafian e plehrave ka paguar Edi Rama!
Pasi Kryetari i Partisë Demokratike, Lulzim Basha, denoncoi skandalin me Milva Ikonomi e cila pritet të komandohet në krye të Bashkisë Durrës për të firmosur vjedhjen me inceneratorët, ka reaguar Kryeministri Edi Rama duke e akuzuar Partinë Demokratike se ka një marrëdhënie fiziologjike me kaosin urban dhe mbeturinat por nuk ka vonuar përgjigja e Bashës duke dhënë dhe shifrën konkrete të vjedhjes me plehrat:
“75 milionë euro për mafian e plehrave ka paguar Edi Rama, nga lekët e shqiptarëve. Asnjë kacidhe për 100 mijë të papunë, për pensionistët,për mjekët dhe infermierët, për sipërmarrjen drejt kolapsit,” thekson Lulzim Basha në përgjigjen e tij përmes rrjetit social Twitter duke përfunduar:
“Boll me vjedhje e me kakarisje gënjeshtrash dalë boje. Zbato Planin me 5 pika! Tani!”
Ndryshe, sot Kryetari i Partisë Demokratike, Lulzim Basha, gjatë një bashkëbisedimi me gazetarët sqaroi se për inceneratorët Edi Rama e ka në mendje ta shkarkojë për herë të pestë apo të gjashtë kryetaren e bashkisë së Durrësit sepse ajo nuk pranon të firmosë një aferë qindra milionëshe për të çuar lekë tek inceneratori i Tiranës.
