Përgjigje Letrës së opozitës, Gjiknuri: OK rifillimit të punës për Reformën Zgjedhore. Mbledhje të hënën!

Pas Letrës së opozitës me kërkesa konkrete për rifilimin e punës për Reformën Zgjedhore, Bashkëkryetari i Komisionit për Reformën Zgjedhore, Damian Gjiknuri,  shprehet i gatshëm për të rifilluar punën në Këshillin Politik dhe në emër të mazhorancës konfirmon praninë në mbledhjen vijuese të Grupit të Punës së Këshillit Politik, ditën e hënë, datë 11.05.2020, ora 10:00, të cilën në kushtet e diktuara nga COVID-19, mundësisht ta zhvillojmë përmes hapësirës digjitale.

Përgjigjja

Konfirmim për përcaktimin e datës së mbledhjes së Grupit të punës së Këshillit Politik për Reformën Zgjedhore

Drejtuar: Z.Oerd Bylykbashi
Adresa: Partia Demokratike
Bulevardi Zhan Dark, Nr.11, Tiranë

Z. Petrit Vasili

Adresa: Lëvizja Socialiste për Integrim
Rruga “Sami Frashëri”, Godina 20/10, Tiranë

Z. Bylykbashi,
Z. Vasili,

Pasi u njohëm përmes medias me letrën tuaj, shprehim vlerësimin tonë për gadishmërinë e shprehur prej jush për të rifilluar punën e Këshillit Politik për Reformën Zgjedhore.

Ky qëndrim i ri i juaji, duhet përshëndetur si një reflektim serioz në raport me deklarimet tuaja publike të bëra ditët e fundit dhe ne e përshëndesim pa rezervë.

Duke shprehur plotësisht gadishmërinë tonë për të vazhduar procesin gjithëpërfshirës të dialogut dhe diskutimin në kuadër të tryezës së Këshillit Politik, shprehim edhe urimin tonë që përmes punës së përbashkët, brenda muajit maj të gjejmë edhe dakordësinë e plotë për draftin që do t’i shkojë për miratim Kuvendit të Shqipërisë.

Ne konfirmojmë praninë në mbledhjen vijuese të Grupit të Punës së Këshillit Politik, ditën e hënë, datë 11.05.2020, ora 10:00, të cilën në kushtet e diktuara nga COVID-19, mundësisht ta zhvillojmë përmes hapësirës digjitale.

Duke ju falenderuar,
BASHKËKRYETARI I KOMISIONIT PARLAMENTAR PËR REFORMËN ZGJEDHORE:
DAMIAN GJIKNURI