Përgjigje Thaçit, Kurti: Jemi duke finalizuar Marrëveshjen me LDK-në

Kryetari i Lëvizjes Vetëvendosje, Albin Kurti, sot përmes një letre drejtuar presidentit Hashim Thaçi duke ju përgjigjur kërkesës së tij për të nominuar një kandidat për kryeministër, i bënë me dije se Marrëveshja me Lidhjen Demokratike të Kosovës është në fazën e finalizimit

Albin Kurti i kërkon Presidentit që të mos bëjë vlerësime politike dhe presion përmes paragjykimit të procesit politik të formimit të qeverisë, proces që sipas tij është i përcaktuar qartë me Kushtetutë dhe i sqaruar në hollësi me aktgjykime të Gjykatës Kushtetuese ku presidenti nuk mund të bëjë interpretime shtesë.

Kushtetuta nuk i njeh presidentit të republikës asnjë autoritet për të ushtruar një vetemërim, vetësugjerim për emërim ose vetëpërcaktim të kandidatit që përfaqëson vullnetin e subjektit politik fitues të zgjedhjeve, thekson Kryetari i Lëvizjes Vetëvendosje, dhe se roli i presidentit është pasiv në të gjithë procesin e krijimit të qeverisë, dhe ai vetëm formalisht mandaton një kandidat pasi atij i dërgohet emri nga subjekti që ka shumicën parlamentare.

Një veprim ndryshe i Thaçit, thekson Kurti, mund të shtrembërojë rendin kushtetues, siç janë dhe interpretimet subjektive dhe të pabaza se ndokush obligohet të veprojë shpejt apo ngadalë.

Në fund, Albin Kurti shprehet se Vetëvendosje nuk po e shfrytëzon këtë kohë për të neglizhuar ndërtimin e koalicionit as edhe të cenojë autoritetin e presidentit, por me qëllim të arritjes së një marrëveshjeje politike që adreson një dakordim për programin qeverisës.

Marrëveshja me Lidhjen Demokratike të Kosovës, saktëson Albin Kurti, është në fazën e finalizimit dhe në një të ardhme të afërt do t’i dërgohet zyrtarisht emri i të nominuarit për Kryeministër të Kosovës.