Përgjimet “Bild”/ 16 publikimet, si u blenë votat në Dibër?!

Gazeta gjermane ‘Bild”, sot publikoi 16 përgjime të reja, në lidhje me skandalin e  blerjes së votave në Shqipëri. Përgjimet e publikuara janë pjesë e dosjes 184 të prokurorisë, për blerjen e votave në zgjedhjet e parakohshme lokale në Dibër.

Sipas “Bild”, përgjimet tregojnë se ka pasur një plan sistematik nga Partia Socialiste e kryeministrit Rama, për të manipuluar zgjedhjet në vitin 2017.

Në përgjimet e publikuara del emri i Kryeministrit Edi Rama, Ish-Ministri Damian Gjiknuri, Ish-Deputeti Pjerin Ndreu, Ish-deputeti Artan Gaçi, Shefi i komisariatit numër pesë në Kamëz, Sali Skura,Drejtori i zyrës arsimore të Dibrës, Drini Gjeçi dhe “super-mani” i ketij makabriteti elektoral, Drejtori në Ministrinë e Brendshme, Arben Keshi.

Në përgjimin e parë, del Kryeministri Rama duke folur me Arben Keshin. Në bisedë me të, Rama e pyet se si duket situata dhe nëse rezultatet janë tek pritshmëritë.

Në përgjimin numër 2, shfaqet Arben Keshi duke folur me ish-deputetin e PS-së, Artan Gaçin.

Në përgjimin  numër 3, është sërish Arben Keshi i cili flet me një person të paidentifikuar, ku së bashku dëgjohen të bëjnë pazar për blerjen e votave.

Në përgjimin numër katër, është Arben Keshi duke folur me një mësues, i cili i thotë se ka një person që ka katër vota, por që kërkon 20.000 lekë pasi do të fejohej.

Në përgjimin e pestë zbardhet dialogu mes Arben Keshit, drejtor në Ministrinë e Brendshme dhe dy personave të tjerë, ku njëri prej tyre ankohet se nuk i ka marrë paratë për votat.

Në audio-përgjimin numër 6, Arben Keshi flet me një person të paidentifikuar, i cili i flet për një person duke i thënë se “nuk e ka pranuar ofertën”.

Në përgjimin e 7-të, del biseda e Arben Keshit me drejtorin rajonal në Dibër, i cili i kërkon që të telefonojë të gjithë drejtorët e shkollave dhe t’i kujtojë të votojnë për PS-së, pasi në të kundërt do të pushohen të gjithë nga puna.

Në përgjimin e 8-të, është publikuar biseda mes Arben Keshit dhe Shefit të Komisariatit të Kamëz, i cili i thotë Keshit se kreu i Bashkisë së Kamzës ka nisur 450 njerëz me furgon drejt Lurës dhe Reçit.

Në përgjimin numër 9-të, Keshi flet me e shefin e Komisariatit numër 5 Sali Skurën, ku ky i fundit e informon rreth situatën, ndërsa thotë edhe se kanë bllokuar disa autobusë.

Në përgjimin numër 10-të, është zbardhur biseda mes ish-minsitrit Damian Gjiknuri me Arben Keshin, ku ish-ministri dëgjohet të thotë se do t’i çojë tek qendra votimi disa djem problematik që t’i ketë për çdo rast.

Në përgjimin numër 11-të, rezulton biseda mes ish-deputetit Pjerin Ndreu, aktualisht kandidat për zgjedhjet e 30 qershorit në Bashkinë e Lezhës, me Drini Gjecin drejtor i Arsmit në qarkun e Dibrës.

Në përgjimin numër 12-të, është zbardhur biseda mes drejtorit rajonal të arsimit në Dibër, Drini Gjeci, me një mësues, duke i kërkuar që së bashku me familjen të hedhin hapur votën, duke i kërcënuar se në të kundërt, atyre do t’i duhet të kërkojnë për një punë tjetër.

Në përgjimin numër 13-të, drejtori i Arsimit në Dibër, Drini Gjeçi telefonon shtetasin Lavdrim Murati dhe e pyet se a ka votuar, duke i kërkuar edhe njëherë sigurinë se do ët votojë ashtu sikurse ishin marrë vesh.

Në përgjimin numër 14-të, është sërish ish-ministri Damian Gjiknuri, teksa flet ne telefon me Bekim Krashin, biznesmen, i cili është angazhuar për zgjedhjet në Dibër me Partinë Socialiste. Sipas përgjimit të BILD, Gjiknuri i kërkon llogari biznesmenit se kush është angazhuar në një komunë të caktuar dhe që ka mbuluar pjesën e transportit të parave.

Në përgjimin numër 15-të, Biznesmeni Bekim Krashi dhe një person i paidentifikuar, flasin për paratë që janë shpërndarë për blerjen e votave. Personi i paidentifikuar pyet se sa para mund të ofrojnë për një votë, sepse ai ka dy familje, në total 5 vota. Çmimi për një votë është rreth 4.000 lekë.

Në përgjimin e 16-të të publikuar nga Peter Tiede, është zbardhur biseda e Bekim Krashit me një prej votuesve në Dibër. Votuesi duket se e ka shitur votën e tij për partinë socialiste dhe në bisedë pyet personin që e ka paguar atë në këtë rast, Bekim Krashin se çfarë shenje duhet të vendosë në fletën e votimit që ata ta kuptojnë