Përgjimet “Bild”, Basha: Ndëshkimi i vjedhësve të votave, themeli i zgjidhjes politike!
Pas publikimit të përgjimeve nga gazeta gjermane “Bild” dhe reagimit kriminal të mazhorancës së koordinuar nga Kryeministri, Kryetari i Partisë Demokratike, Lulzim Basha reagon duke theksuar se këto përgjime treguan se në Shqipëri janë vjedhur të gjitha zgjedhjet që ka organizuar Edi Rama, dhe duke garantuar se çdo krim do të ndëshkohet tha se ndëshkimi i vjedhësve të votave është themeli i zgjidhjes politike
“Manipulimi i zgjedhjeve në Shqipëri ka qenë shtrirë si në kohë, ashtu edhe në të gjithë territorin e vendit. Praktikisht në Shqipëri janë vjedhur të gjitha zgjedhjet që ka organizuar Edi Rama, në mënyrë masive në të gjithë vendin. Ky është përfundimi kryesor që i madh e i vogël, në Shqipëri dhe kudo në botë, nxjerr nga përgjimet e “Bild” dhe nga të gjitha skandalet e tjera të 6 viteve të fundit.”
Dhe jo vetëm kaq! Përgjimet e “Bild”, tha Lulzim Basha, na dëshmuan në detaje përmasat, elementët dhe metodat e kësaj vjedhje:
1.Së pari, prej tyre mësuam se kupola e Organizatës Kriminale të Rilindjes në krye të PS nuk ka bërë asnjë lloj dallimi mes kriminelëve që ka përdorur. Ka mjaftuar që individi të jetë kriminel i aftë dhe i gatshëm të dhunojë dhe është bërë bashkëpunëtor i PS-së. Ata kanë bashkëpunuar me trafikantë droge. Kanë bashkëpunuar me trafikantë qeniesh njerëzore. Kanë bashkëpunuar me vrasës. Kanë bashkëpunuar me grabitës.
2. Së dyti, kjo aleancë Krim-Rilindje ka përdorur çdo mjet dhe çdo mekanizëm për të vjedhur votën. Ata kanë blerë vota me para në dorë. Kanë kërcënuar qytetarë për të votuar për PS-në. Kanë dhunuar dhe kanë penguar nga votimi ata që nuk do të votonin për PS-në. Kanë ndëshkuar ata që nuk u janë bindur Çdo mjet i dhunshëm dhe i paligjshëm është përdorur pa asnjë kufizim.
3.Së treti, aleanca Krim-Rilindje ka përdorur të gjithë administratën shtetërore dhe të gjithë aparatin shtetëror për vjedhjen e zgjedhjeve. PS ka përdorur nëpunësit civilë Ka përdorur nga drejtorët tek punonjësit e thjeshtë Ka përdorur administratën qendrore dhe atë lokale Ka përdorur institucionet e varësisë dhe të pavarura Ka përdorur punonjësit e ndërmarrjeve publike
4.Së katërti, në vjedhjen e zgjedhjeve Aleanca Rilindje-Krim ka përfshirë gjitha nivelet partiake dhe shtëtërore: Nga kryetari i partisë, tek drejtuesi më i ulët Nga kryeministri, tek cdo ministër e depute e zëvendës ministër Nga aparatçikë patiakë, tek komisionerë zgjedhorë
5.Mbi të gjitha, Edi Rama është timonieri i vjedhjes së zgjedhjeve. Çdo gjë është bërë nën drejtimin e tij, me planifikimin, koordinimim, shtytjen dhe kontrollin e tij. Është Edi Rama ai që e ka bërë bashkë këta lukuni karakteresh dhe personazhesh për të kryer një mision të përbashkët. Nga përvoja e tij e gjatë e bashkëpunimit me trafikantë, pastrues parash, kriminelë dhe biznesmenë, ai ka fituar aftësinë si të përdorë pushtetin për të koordinuar dhe shkrirë interesat kriminale dhe korruptive me pushtetin politik dhe si ta bëjë pushtetarin të punojë me kriminelin. Ky është gjenialiteti kriminal i Edi Ramës. Sikurse u pa në Durrës dhe në Dibër, sikurse është parë në gjithë Shqipërinë, sot krimi, qeveria, dhe bizneset grabitqare janë shkrirë në një, janë kthyer në një sipërmarrje të përbashkët aksionere. Brenda kësaj sipërmarrjeje, secili ka aksionet e veta, detyrat e veta dhe merr pjesën dhe përfitimin e vet. Por të gjithë veprojnë me një qëllim, në mënyrë të koordinuar dhe në bashkëpunim të strukturuar kriminal.
Ndëshkimi i vjedhësve
Ndëshkimi i vjedhësve të votave është themeli i zgjidhjes politike, vlerëson lideri i opozitës ndërkohë Edi Rama kërkon ta bëjë qesharak megakrimin zgjedhor:
“Kanabizimi i Shqipërisë nga Edi Rama ka pasur qëllim të qartë prodhimin e parave për t’i ndarë me pushtetarët dhe për të financuar vjedhjen e zgjedhjeve. I gjithë ky projekt ishte një projekt shkatërrues për vendin. Jo thjesht sepse prodhoi drogë, jo vetëm sepse kapi politikën nga krimi, por sepse ai shkatërroi ekonominë dhe mundësitë për shqiptarët e thjeshtë,” ka Basha dhe ekonomia shqiptare tashmë është bërë e varur nga droga, njësoj si Edi Rama dhe banda e tij.
Biznesi i ndershëm është në gjendje kolapsi dhe të vetmit që bëjnë hajër janë biznesi i lidhur dhe i financuar me paratë e drogës. Pasojat janë papunësia në nivele rekord, varfëria dhe depresioni ekonomik dhe social. Por këto pasoja, tha ai, do të jenë edhe më të rënda, nëse nuk ta ndalim tani këtë makineri kriminale, të drejtuar nga Edi Rama.
“Reagimi arrogant i Edi Ramës dhe bashkëkriminelëve të tij zgjedhorë, me përpjekjet e tyre për ta normalizuar dhe bërë qesharake, ka për qëllim ta mohojë këtë megakrim me shpresë se shpejt do të harrohet.”
Asgjë nuk do harrohet, siguroi Lulzim Basha, asgjë nuk do të tolerohet. Çdo krim do të ndëshkohet. Rruga drejt normaliteti politik dhe shoqëror në Shqipëri kalon nga nxjerrja e të gjithë përgjegjësve para drejtësisë.
“Asnjë hap politik, asnjë zgjidhje politike në Shqipëri nuk do të bëhet pa patur në themel të saj ndëshkimin e të gjithë atyre që kanë vjedhur votat e shqiptarëve. Asnjë marrëveshje politike për daljen nga kriza nuk do mund të arrihet, nëse pika numër 1 e saj nuk është ndëshkimi i vjedhësve të votave. Kjo kupolë kriminale do të mbajë përgjegjësi për të gjitha vjedhjet dhe krimet që u ka bërë shqiptarëve,” garantoi Kryetari i Partisë Demokratike, duke shtuar se zgjedhjet e lira dhe të ndershme dhe ndëshkimi përmes drejtësisë janë rruga jonë drejt së ardhmes Shqipëria ka nevojë për një operacion të thellë për të hequr kancerin e së keqes dhe të tillë do ta ketë.
“Zgjedhjet e lira dhe të ndershme dhe ndëshkimi përmes drejtësisë është rruga jonë drejt së ardhmes. Në Shqipëri nuk do të ketë më të fortë as në politikë, as në institucione dhe as në rrugë. Boll më me Shqipërinë si plaçkë e tyre. Boll më me shqiptarët kokëulur dhe në gjunjë para tyre, tha Kryetari i Partisë Demokratike, Lulzim Basha, duke nënvizuar se është koha për Shqipërinë e te gjithë shqiptarëve, ndërsa përfundoi:
“Për këtë ju ftoj te bashkohemi si popull, si njerëz të lirë, si prindër dhe bij e bija shqiptarësh të ndershëm, si qytetarë pa dallime partiake, nesër në orën 20:00 në protestën kombëtare në Tiranë.”
