Përgjysmohen lëvizjet e brendshme në 2018-n

Lëvizjet e brendshme të shtetasve në 2018-n janë përgjysmuar në krahasim me një vit më parë. Sipas të dhënave të publikuara nga INSTAT në publikim Gra dhe Burra në 2018-n kanë lëvizur rreth 26 mijë e 437 shtetas.  Numri i grave që kanë lëvizur në 2018-n ishte 17,378, dyfish më i lartë se ai burrave. 

“Gjatë këtij viti, numri i migrantëve të brendshëm burra ka pësuar një rënie të konsiderueshme me 57,3 %, ndërsa ai i migranteve të brendshme gra u zvogëlua me rreth 40,4 %. Gjatë periudhës 2014–2018, numri i migranteve të brendshme gra ka qenë më i lartë se numri i migrantëve të brendshëm burra, duke shënuar 65,7 % në vitin 2018,” shkruhet në publikimin e INSTAT. 

Prej 2014-s, numri më i lartë i të shpërngulurve u arrit në 2016-n, vit në të cilin INSTAT regjistroi 57,920 shpërngulje. Edhe në 2017-n, numri i lëvizjeve të brendshme i kaloi 50 mijë. Ndërsa numri në total i lëvizjeve të brendshme gjatë 5 viteve të fundit ishte 204 mijë. 

Lëvizjet e brendshme sipas grupmoshave 

Te burrat, numrin më të lartë të lëvizjeve të brendshme e ka shënuar grupmosha 25-29 vjeç me 1,262 lëvizje dhe grupmosha 30-34 vjeç me 1361 lëvizje. Trendi ka qenë i njëjtë në pesë vitet e fundit sipas të dhënave që ka nxjerrë INSTAT në raport. 

Në ndryshim, lëvizjet e brendshme te gratë vihen re në një moshë më të hershme. Sipas statistikave të INSTAT numri më i lartë i lëvizjeve të brendshme te gratë vihet re në grupmoshat 20-29 vjeç. Kështu për vitin 2018, numri i lëvizjeve të brendshme te gratë e moshës 20-24 vjeç ishte 4223 dhe te grupmosha 25-29 vjeç ishte 4341. 

Ritmi i lëvizjeve mbetet i lartë edhe për grupmoshën 30-34 vjeç me 2291 lëvizje dhe 35-39 vjeç me 1135 lëvizje gjatë 2018-s./Monitor/