“Përhapi panik”, Kurti shkarkon Ministrin e Brendshëm; Kërcënon Mustafa!
Në pikun e debatit Kryeministër-Presidencë, Ministri i Brendshëm, Agim Veliu ndryshe nga kabineti qeveritar u rendit në taborrin e Presidentit Hashim Thaçi duke u shprehur për shpalljen e gjendjes së jashtëzakonshme, meqë sipas tij, nga ora në orë po shtohet numri i të prekurve. Por ky prononcim publik i Agim Veliut i ka kushtuar me shkarkim pasi Kryeministri Albin Kurti e vlerësoi si përhapje paniku dhe mungesë lidershipi.
Meqë as Ministria e Shëndetësisë e as Instituti Kombëtar i Shëndetësisë Publike nuk thanë që numri i të infektuarve me COVID-19 po rritet nga ora në orë, në momentet kur e gjithë administrata publike po bën përpjekje maksimale për të minimizuar dëmet nga virusi Korona, udhëheqësit e institucioneve qendrore, përfshirë këtu anëtarët e kabinetit qeveritar duhet të demonstrojnë maturi si në vendime ashtu edhe deklarime.
“Përmes deklaratave të tij të bëra publikisht, por jo edhe të mbështetura me qëndrime të t ij në mbledhje të brendshme, Ministri i Punëve të Brendshme dhe Administratës Publike, z. Veliu ka dëshmuar mungesë të theksuar lidershipi dhe ka minuar hapur punën e qeverisë, pjesë e të cilës ai është. Në këto rrethana jam i detyruar të veproj, andaj edhe kam vendosur të shkarkoj z. Veliu nga detyra e Ministrit të Ministrisë së Punëve të Brendshme dhe Administratës Publike. Unë kam njoftuar Kryetarin e LDK-së, z. Isa Mustafa, për vendimin që kam marrë dhe po ashtu kam kërkuar prej tij që sa më shpejtë të ma dërgojë emrin e ministrit të ri”, thuhet në njoftimin e Kryeministrisë duke bërë të ditur shkarkimin e Agim Veliut.
Ndërkohë, deri në zgjedhjen e ministrit të ri, të gjitha vendimet brenda Ministrisë së Punëve të Brendshme dhe Administratës Publike do të merren nga Zv/Ministri Xhelal Sveçla.
Por ky vendim nuk është pritur mirë nga Kryetari i LDK, Isa Mustafa, i cili duk e konsideruar të papranueshëm kërkoi nga Albin Kurti që të anulojë vendimin për shkarkimin e Veliut.
“Kjo është shkelje e marrëveshjes së koalicionit. Me marrëveshje kemi përcaktuar se ministrat mund të shkarkohen nga kryeministri në konsultim me kryetarin e subjektit politik me të cilin është bërë koalicioni, bazuar në një arsyetim që e pranon kryetari i LDK-së. Si kryetar i LDK-së nuk jam konsultuar nga kryeministri dhe aq më pak i pranoj arsyet e tij të bëra publike,” theksoi Mustafa në reagimin e tij përmes rrjetit social Facebook duke kërcënuar edhe me prishje të koalicionit.
“Veprimet e njëanshme të kryeministrit janë të dëmshme dhe të papranueshme dhe çojnë në prishje të koalicionit,” tha Isa Mustafa e meqë filloi të shkruaj në Facebook i futi dhe një kërkesë Albin Kurtit që të marrë vendim edhe për heqjen e taksës ndaj prodhimeve të importuara nga Serbia dhe Bosnja deri në fund të javës.
Ndryshe, mbrëmë vonë pas mesnate, Ministri i Punëve të Brendshme dhe Administratës Publike, Agim Veliu, në një prononcim për media u shpreh kundër qëndrimit të Kryeministrit të Kosovës mbi shpalljen e gjendjes së jashtëzakonshme. Ai, gjithashtu, në këtë deklarim, përhapë panik duke thënë se “numri i të prekurve po rritet prej ore në orë”.
