Përhapja e koronavirusit, OBSH: Po përshpejtohet nga 20, 30 dhe 40-vjeçarët!

Organizata Botërore e Shëndetësisë, OBSH, u shpreh e shqetësuar sot që përhapja e koronavirusit është duke u regjistruar në mesin e personave të moshave 20, 30 dhe 40-vjeçare, shumica e të cilëve nuk kanë qenë të vetëdijshëm se kanë qenë të infektuar, çka përbën rrezik për grupet e ndjeshme.

Zyrtarët e OBSH-së theksuan këtë muaj se shifrat e të rinjve të infektuar janë rritur në nivel global, duke rrezikuar kategoritë e ndjeshme të shoqërisë në gjithë botën, raporton RFE, duke përfshirë të moshuarit dhe të sëmurët.

“Epidemia është duke ndryshuar,” tha Drejtori i OBSH-së për rajonin e Paqësorit, Takeshi Kasai, duke shtuar:

“Personat e moshave 20, 30 dhe 40-vjeçare janë duke përhapur virusin. Shumica as nuk janë të vetëdijshëm se janë infektuar.”

Rritja e numrit të rasteve të reja ka shtyrë disa shtete të rivendosin kufizime në lëvizje, ndërkohë që kompanitë janë në garë për gjetjen e vaksinës për virusin që ka shkatërruar ekonomitë, ka lënë të vdekur më shumë se 770.000 persona dhe ka infketuar 22 milionë banorë në nivel global, raporton Agjencia e lajmeve, Reuters.