Përjashtimi i Berishës, FRPD: Referendum, për të ruajtur unitetin e PD-së

Pas përjashtimit të Sali Berishës nga Grupi Parlamentar i Partisë Demokratike, anëtarët e kryesisë së FRPD, i janë drejtuar përmes një letre Sekretarit të Përgjithshëm, Gazment Bardhi, Kryetarit të Këshillit Kombëtar, Edi Paloka, dhe Kryesisë së PD, duke kërkuar që vendimi i Kryetarit Lulzim Basha t’i nënshtrohet një referendumi në anëtarësinë e partisë si të vetmen rrugë për të ruajtur unitetin e PD-së, thuhet në shkresë.

“Po ju drejtohemi nëpërmjet këtij peticioni lidhur me situatën e paprecedentë të krijuar nga vendimi personal i Kryetarit të Partisë Demokratike për përjashtimin nga grupi parlamentar i Profesor Doktor Sali Berisha.

Duke e konsideruar këtë veprim në shkelje të plotë të statutit, parimeve, vlerave të Partisë Demokratike si dhe rrezikun që mbart për përcarjen e thellë dhe të parikuperueshme të saj kërkojmë që ky veprim t’i nënshtrohet me domosdoshmëri një referendumi në anëtarësinë e partisë si të vetmen rrugë për të ruajtur unitetin e Partisë Demokratike të Shqipërisë,” thuhet në letrën e cila është firmosur nga anëtarët e Kryesisë së FRPD.