Përjashtohet nga Grupi, reagon Berisha: Do ta rivendos sovranitetin në PD!

Pas vendimit të Kryetarit të Partisë Demokratike, Lulzim Basha, për ta përjashtuar liderin historik nga Grupi Parlamentar, në reagimin e tij të parë Ish-Presidenti Sali Berisha u zotua se do të rikthej sovranitetin e PD-së.

“Kam komunikuar me zotin Basha dhe i kam thënë këto që po u them ju. E dija që ishte nën presion, por nuk mendoja se ai duke mos respektuar asnjë rregull, të shpallte këtë vendim personal,” tha Sali Berisha duke e bërë të ditur se kishte komunikuar me Kryetarin e PD 30 minuta para se ai ta shpallte vendimin ndërsa tani e tutje ai bëri publik dhe hapat që do të ndjekë:

“Basha i bëri gjëmën PD-së. Mua më kanë kërcënuar edhe me fëmijë, por unë do të qëndroj në mbrojtje të sovranitetit të këtij vendi dhe të PD-së. Unë nesër do të shkoj në parlament, jam në parlament. Me veprimin e tij, kryetari i PD, shkelmoi parimet themelore. PD-në e kanë themeluar studentët dhe intelektualët dhe punonjësit shqiptarë në kulmin e izolimit, në kulmin e rrethimit. Sot Lulzim Basha, nën presionin e lobimit korruptiv nga Edi Rama dhe George Soros, shpalli vendimin më të paligjshëm në historinë e pluralizmit,” tha lideri historik i PD, Sali Berisha, në reagimin e tij duke përfunduar:

“Do bëjë gjithçka me çdo demokrat për të rivendosur sovranitetin e PD-së për të cilin sot Lulzim Basha do kishte dhënë 5 herë dorëheqjen para se ta shkelmonte!”