Përkeqësimi situatës, Basha: 25 Prilli ditë e largët, qytetarët duhet të ndihmohen sot jo nesër!

Pas turit nëpër qytete të ndryshme të Shqipërisë ku konstatoi sa situata po përkeqësohet dhe qeveria nuk po bën asgjë, Kryetari i Partisë Demokratike, Lulzim Basha, reagoi duke sjellë në vëmendje Planin me Rimëkëmbje Ekonomike me 5 Pika sepse qytetarët duhet të ndihmohen sot dhe jo nesër.

“Para dy javësh, shpalosëm një plan me 5 pika për rimbëkëmbjen. Nga ajo ditë kam qenë në një turn ë qytete të ndryshme. Situata po përkeqësohet me shpejtësi, kriza sa vjen e thellohet. 100 mijë shqiptarë kanë humbur vendet e punës, mijëra biznese rezultojnë pa fitim, shumë kanë shpallur faliment.

Situata përkeqësohet, qeveria nuk bën asgjë. Kosova, Maqedonia e veriut kanë prezantuar paketën e katërt, këtu ndonëse opozita pas një punë prej mëse 6 javësh, prezantoi një plan, qeveria nuk e vë ujin në zjarr. Nga mosmarrja e masave BB dha një parashikim se 41.5 e popullsisë do të zhyten në varfëri dhe kjo është një dhimbje që e ndjen cdo familjar. Ndaj kërkuam të merren masa për njerëzit që kanë humbur vendet e punës, sipërmarrjen e vogël, pensionistët, si edhe në tërësi sipërmarrjen prodhuese. Hapi kryesor ishte ndihma për sektorin shëndetësor, si edhe një ndihmë e vecantë për shkollat, hapja e të cilave ka shtuar rrezikun. Për fat të keq asgjë deri tani. E keni parë, shumë prej qytetarëve pyesin: Çfarë do bëhet me ne?” tha lideri i Opozitës së Bashkuar duke e bërë të qartë sot se 25 prilli për këta qytetarë dhe familjet e tyre është një ditë e largët.

“Ata duan të dinë si do t’ja dalin sot? Për këtë arsye plani me 5 pika parashikon mbështetje direkte nga shteti, sot jo nesër. Kur do shkojnë taksat te njerëzit nëse jo sot. Ndaj kemi propozuar që biznesi mos falimentojë, kemi propozuar një çek për pensionistët,” tha Basha duke theksuar gjendjen e rëndë nga Muslym Shyri te Rr. Durrësit, ku mbështetja është urgjente.

“Situata shëndetësore përkeqësohet ditë pas dite. Sado të fshihen shifrat, qytetarët që janë sëmurë e po shtohen nuk fshihen dot. Dje, mu konfirmua ajo që pash edhe në Durrës e Elbasan, lista në farmaci. Numri i njerëzve me listë po shtohet në mënyrë në të frikshme. Nuk arrijnë dot të blejnë një tabak, jo më kutinë. Kjo kosto shkon në 600 mijë lekë minimumi. Ku do ti gjejnë paratë të infektuarit që kanë humbur vendin e punës, ndaj kemi propozuar rimbursimin. Të gjitha institucionet ndërkombëtare kanë parashikuar rënie ekonomike,” tha Kryetari i PD ashtu siç theksoi dhe Banka Botërore se është ulur parashikimi për ekonominë, borxhi publik po rritet por paratë nuk po shkojnë te njerëzit.”

Maska e detyrueshme, ose gjobë!

Me këtë rast Lulzim Basha foli dhe për masën e fundit të Qeverisë për mbajtjen e maskës kudo me detyrim.

“ Dy javë më parë, kërkuam që qeveria të marrë masa për valën e dytë të pandemisë. Ka dalë me dhjetra here në ekran e ka sulmuar opozitën, në vend që t’i vinte veshin propozimeve tona, meqë vetë ësht ëpa ide, po e ka mendjen të mbushë xhepat e tij e të klientëve të tij. Po ti kishte vënë veshin propozimit tonë më 11 mars, nuk ishim në këtë gjendje. Të njëjtën gjë i thamë para dy javësh nga kjo sallë,” tha Basha duke përsëritur Planin me 5 Pika të rimëkëmbjes nga kriza.

Pika e parë e planit: mbështetja e përgatitja e sistemit shëndetësor, duke rritur numrin e testimeve në 2500 në ditë. Cfarë ka bërë? Më thuaj.. ju e ndiqni, dhe del sot e thotë do mbani maska, ndryshe ju gjobis. Po ata që s’kanë të blejnë bukën e fëmijëve me ca do i blejnë? Pse nuk ke marrë masa, për maska falas?

 Pika e dytë: Arsim i sigurtë, fëmijët e mësuesit të jenë të sigurtë. 70 % e shkollave janë pa ujë të rrjedhshëm. Vetëm ai mbyll sytë, del sot e thotë maskën ose të gjobis, po ata që s’kanë para? Po ai me 50 mijë lekë ndihmë ekonomike?  Testim periodik për stafin ndihmës. Kosova e bën, po këtu thonë për cfarë duhet..

Pika tre: Asnjë shqiptar mos lihet pas dore. Kushdo ka humbur vendin e punës të përfitojë një cek mujor. Një fond punësimi për bizneset për të rimarrë në punë atë që e ka hequr nga puna. Dyfishim i ndihmës ekonomike, po prap nuk mjafton.  Nëse do bënte këtë realitet, mund të thoja që edhe një pensionist mund ta blejë. Po siguroja maskën.

Pika katër: Ndihma për biznesin e vogël mbështetje drejtpërdrejtë, një cek 1000 euro, taksat ia ka marrë kokërr më kokërr, edhe pagat e luftës i dorëzoi si pagesa sigurimesh apo taksa.

Pika pestë: Rikonceptimi nga skemat e garancisë sovrane për t’u bërë më e aksesueshme nga biznesi. Ky propozim ka dy javë në tavolinë, e kanë mësuar edhe shqiptarët planin me 5 pika. I vetmi që s’ia ka vënë veshin, është njeriu që paratë që dalin e teprojnë ua jep ditë për ditë në mënyrë kriminale, klientëve të tij.”

Problemet që shkaktuan krizën!

Duke akuzuar Edi Ramën se po vjedh qytetarët, Kryetari i Partisë Demokratike tha se kriza aktuale po thellohet dhe si e tillë nuk përballohet me llafe ndërsa i kujtoi Kryeministrit të zbatojë Planin e PD-së me 5 Pika për përballimin e situatës së krijuar nga COVID-19. Në të kundërt ai u zotua për ndëshkimin e Edi Ramës.

“Cilat janë dy problemet kryesore që shkakton kjo krizë, rënie e konsumit, mbylljen e biznesit, një rreth vicioz. Këtu duhet dora e shtetit, sot duhet ndërhyrja e qeverisë për të shkuar tek njerëzit jo tek klientët e qeverisë.

Këta po bëjnë të kundërtën. Sot nuk kanë burime financiare për t’iu siguruar bukën e gojës njerëzve. Nuk kanë burime financiare për maska dhe dezinfektantë për pensionistët. Kollaj t’iu thuash njerëzve mbani maskë. Me çfarë do ta blejnë maskën. Nuk i shkon në mend për ta.

Paratë janë, por paratë po vidhen. Kriza aktuale dhe që po thellohet nuk përballohet me llafe. Kriza dhe epidemia nuk përballohet me gërr-vërre dhe gënjeshtra. I kam propozuar një plan konkret.

Kemi një kryeministër dhe një qeveri që është e vendosur të injorojë interesin dhe nevojat akute të qytetarëve dhe të vazhdojë vjedhjen. Është një problem jetik për vendin dhe kërkoj një bashkim të madh shqiptarësh. Nuk pret koha deri më 25 prill, ndaj nëse këto dy javë i jam drejtuar me civilitet që të marrë planin dhe të zbatojë sot i them që mosbatimi i planit me 5 pika e ngarkon Edi Ramën me përgjegjësi jo thjesht politike por dhe penale. Çdo dëm i shkaktuar në jetë, në ekonominë e vendit nesër nuk do të jetë thjesht një problem i madh për qytetarët, përgjegjësi politike e këtyre që kemi akoma por do ndiqet me të gjitha format si përgjegjësi penale,” tha lideri i Opozitës së Bashkuar duke përfunduar:

“T’iu marrësh lekët qytetarëve dhe të mos ua kthesh kur kanë nevojë, nuk është thjesht keqqeverisje, por një krim i rëndë që duhet ndëshkuar dhe zotohem se do bëj gjithçka për ta ndëshkuar. I bëj thirrje të lërë llafet, planin me 5 pika e ka gati ta zbatojë. Të ndalë pagesat korruptive dhe paratë t’i çojë urgjentisht tek njerëzit në nevojë.”

A do pranojë bashkëqeverisje me Ramën?

Në bashkëbisedimin e sotëm me gazetarët, Kryetari i Partisë Demokratike, Lulzim Basha, u pyetur edhe për temën e lançuar nga mediat në shërbim të kryeministrit nëse do të pranonte të bashkëqeverisë me Edi Ramën pas 25 Prillit.

“Rama e di çfarë e pret pas 25 prillit. Pas 25 prillit, Edi Ramën nuk e pret asgjë tjetër përveç gjykimit qytetar dhe vendosmërisë sime për të bërë të mundur që drejtësia të bëjë të sajën dhe ta ndëshkojë për çdo krim dhe aferë korruptive që ua ka nxirë jetën këto 7 vite. Vetëm ky është shpëtimi i Shqipërisë jo vetëm nga përgjegjësi për këtë situatë, por nga kushdo tjetër që mund të mendojë pas tij se mund të bëjë çfarë ka bërë ai me shqiptarët dhe t’ia hedhë pa lagur. Jo! 25 prilli nuk do të jetë thjesht dhe vetëm fillimi i një ndryshimi, por do të jetë fundi i pandëshkueshmërisë. Pushtetet janë ndërruar edhe më parë, por pandëshkueshmëria ka vazhduar. Pa diskutim, për këtë jemi përgjegjës dhe ne. E përsërisim zotimin tim publik: kush ka vënë dorë në interesin publik të shqiptarëve, mbi pasuritë e shqiptarëve, mbi taksat e shqiptarëve dhe ka cenuar rëndë jetën, shëndetin, shpresën e tyre do të marrë ndëshkimin e merituar me ligj,” tha Kryetari i Partisë Demokratike, Lulzim Basha, duke përfunduar:

“Të kuptoni se flluska e Edi Ramës nuk ka asgjë të përbashkët me realitetin. Ky është mjerimi i një qeverie të kapitulluar. Po bën vjedhjen dhe batërdisjen e buxhetit para ikjes së saj. Nevoja ulëritëse për ndryshim kurrë nuk ka qenë më e qartë. Sfida jonë është t’iu tregojmë shqiptarëve se Shqipëria i ka mundësitë për të dalë nga kjo krizë.
Çdo formë reagimi është legjitime ndaj një qeverie që ka braktisur detyrën e saj.”