Përkujtohet 14 Janari 1990, Voltana Ademi: Shkodra e shkodranët vranë të parët frikën!
Sot në 30 vjetorin e përballjes së parë frontale në Shqipëri, përballjen e shkodranëve me diktaturën, Kryetarja e Bashkisë Shkodër, Voltana Ademi, tha se 14 janari 1990 ishte momenti kur busti i Stalinit nuk mund të qëndronte më në sheshin kryesor të Shkodrës dhe sinjali që Shkodra e shkodranët i dhanë Shqipërisë e shqiptarëve.
“14 janari ishte jo vetëm hapi i parë i rëndësishëm drejt shembjes së simboleve të komunizmit në këtë vend, edhe zanafilla e lëvizjeve të tjera që pasuan e kulmuan me 12 dhjetor 1990 me krjimin e të parës parti opozitare pas 45 viteve diktaturë.”
Sot, 30 vjet pas 14 janarit 1990, thekson Voltana Ademi, është moment reflektimi, për të nderuar e vlerësuar kontributin e organizatorëve e pjesëmarrësve në protestën e heshtur të 14 janarit.
A e kemi Shqipërinë që ëndërruam të gjithë në vitin 1990, a është vendi ynë aty ku e meriton të jetë, a është sistemi ku jetojmë ne sot, sistemi që kërkuam të gjithë në vitin 1990?”
“Shqipëria e bashkë me të edhe Shkodra jonë e shkodranët, meritojnë më shumë. Fillimisht punë, mirëqenie, zhvillim dhe prosperitet. Por mbi të gjitha, duan demokraci të vertetë, të drejta të pacënueshme nga askush, barazi para ligjit dhe ndëshkim të krimit e korrupsionit. Këmbanat e alarmit për demokracinë, ka kohë që bien. Është detyra jonë që, të gjithë bashkë të përfundojmë atë që nisëm në 1990! Duke larguar njëherë e mirë të gjitha rudimentet e diktaturës komuniste që po tenton të rikthehet me një pamje më të sofistikuar, por me të njëjtat qëllime të errëta si gjatë 45 viteve diktaturë,” u shpreh Kryetarja e Bashkisë Shkodër, Voltana Ademi, duke përfunduar:
“Nderim, mirënjohje e respekt për të gjithë organizatorët e pjesëmarrësit e 14 janar 1990! Nderim dhe respekt për familjet e tyre, për sakrificat që vuajtën. Nderim për Shkodrën e shkodranët!”
Ish-Presidenti Bujar Nishani i pranishëm në këtë aktivitet tha se edhe sot pas 30 vitesh është koha për reflektim sepse rrezikojmë të përsëritet regjimi monist
Drejtori i Institutit të Studimit të Krimeve dhe Pasojave të Komunizmit Çelo Hoxha tha se krimi komunist në Shqipëri duhet ndëshkuar ndërsa kryetari i Shoqatës Antikomuniste të Përndjekurëve Politikë, Nebil Çika, u shpreh se xhelatët e atëhershëm si Ardian Dvorani sot janë në nivelet më të larta të drejtësisë.
Jan Jansen që në atë kohë punonte për organizatën Amnesty International vlerëson se misioni i 14 janarit 1990 në Shkodër dhe Shqipëri nuk është përmbyllur, mendim të cilin e ka dhe një prej organizatorëve të kësaj proteste, Gjergj Livadhi.
Ndryshe, ajo që më pas u quajt protesta e heshtur e 14 janarit 1990, ishte vazhdimësi e qëndresës 45 vjeçare që Shkodra e shkodranët, me të gjitha mënyrat e me çdo çmim, i bënë regjimit të egër komunist. Jo rastësisht, ata që ishin organizatorët e pjesëmarrësit e kësaj ngjarje, vinin nga familje që e kishin vuajtur mbi shpinë terrorin e regjimit.
