Përkujtohet 75 vjetori i masakrës komuniste të Matjanit

Sot në Bashkinë Divjakë nën kujdesin e Shoqatës Antikomuniste të të Përndjekurve Politikë u përkujtua 75 vjetori i masakrës komuniste të Matjanit.

Në ceremoni morën pjesë dhe folën për këtë masakër, Kryetari i Shoqatës Antikomuniste të të Përndjekurve Politikë, Nebil Çika dhe drejtuesit e tjerë të sajë, Artan Murizi e Uran Kostreci, deputetët e PD, Enkelejd Alibeaj, Myslim Murrizi dhe Luan Baçi, Kryetari i PBKD, Artur Roshi, familjarë te martirëve nacionalistë, të përndjekur politikë antikomuniste.

Duke nderuar me një minut heshtje, të pranishmit vendosen edhe kurora me lule në memorialin kushtuar martirëve nacionalistë e antikomunistë të Divajkës të pushkatuar pa gjyq në fshatin Matjan të Lushnjës, 75 vjet më parë.

 Masakra e Matjanit ku në vitin 1943 forcat komuniste të komanduara nga Mehmet Shehu dhe Dushan Mugosha, pushkatuan pa gjyq 82 nacionalistë antikomunistë, fshatarë të zonës së Divjakës, është një nga krimet më të mëdha komuniste të luftës së dytë botërore që u kthye nga komunistët në luftë civile

Të rënët në këtë masakër janë nderuar nga Presidenti Republikës  Bujar Nishani, me titullin e lartë, Martirë të Demokracisë.