Përmbytje në qendër të Afganistanit, 50 të vdekur

Të paktën 50 persona kanë humbur jetën si pasojë e shirave të rrëmbyeshëm dhe përmbytjeve në qendër të Afganistanit.

Zyrtari për informim në provincën qendrore Gor, Mawlawi Abdul Hai Zaeem, tha për Agjencinë e lajmeve Reuters se nuk dihet numri i personave të lënduar pas përkeqësimit të situatës prej të premtes, që ka rezultuar me bllokim të disa rrugëve.

Zaeem tha se 2.000 shtëpi janë shkatërruar plotësisht, 4.000 pjesërisht dhe më shumë se 2.000 dyqane janë nën ujë në kryeqytetin e provincës Gor, Feroz-Koh.

Javën e kaluar, përmbytjet tjera të shkaktuara nga shirat e rrëmbyeshëm kanë shkatërruar fshatra në veri të Afganistanit, duke vrarë 315 persona dhe duke plagosur më shumë se 1.600 të tjerë, kanë thënë autoritetet afgane.

Të mërkurën, një helikopter i përdorur prej forcës ajrore afgane është rrëzuar për arsye teknike gjatë tentimeve për gjetje të trupave të viktimave.

Afganistani është zonë e ndjeshme ndaj katastrofave natyrore derisa Kombet e Bashkuara e konsiderojnë atë si një prej vendeve më të cenueshme ndaj ndryshimeve klimatike.

Ky vend është përballur me zvogëlim të shkallës së ndihmave prej vitit 2021, kur janë larguar forcat e huaja dhe pushtetin e kanë marrë talibanët.

Situata është përkeqësuar edhe më shumë në periudhën pasuese, raporton RFE, pasi qeveritë e huaja e kritikojnë vazhdimisht udhëheqësinë e talibanëve për shtypjen e të drejtave të grave.