Përmes Platformës Zoom, shpallet dënimi me vdekje

Gjykata në Singapor e ka dënuar me vdekje një 37 vjeçar të shpallur fajtor për trafik droge; Ky është dënimi i dytë që shpallet “në distancë” përkatësisht me platformën Zoom, e cila është bërë popullore gjatë pandemisë së koronavirusit.

Punithan Genasan nga Malajzia, është shpallur fajtor dhe është dënuar me varje sepse në vitin 2011 ka organizuar shitjen e heroinës.

Ky vendim është shpallur deri sa në Singapur vazhdojnë të jenë në fuqi masa të rrepta për parandalimin e përhapjes së koronavirusit.

“Për shkaqe sigurie, procesi gjyqësor është kryer përmes video-konferencës,” tha zëdhënësi i Gjykatës së Lartë të Singaporit për Agjencinë e lajmeve Reuters duke shtuar se ky është dhe rasti i parë i shpalljes në distancë të dënimit me vdekje.

Organizatat për mbrojtjen e të drejtave të njeriut kanë kritikuar shpalljen e vendimit nga gjykata përmes video-konferencës, duke përfshirë këtu edhe një rast në Nigeri ku gjithashtu u shpall një dënim me vdekje në këtë mënyrë.

Avokati i të dënuarit, Peter Fernando, tha se nuk e ka kundërshtuar shpalljen e vendimit përmes platformës Zoom ndërsa shtoi se klienti i tij po shqyrton mundësinë e apelimit të këtij vendimi.
“Dënimi me vdekje në Singapor është mizor dhe johuman, ndërsa përdorimi i teknologjisë ‘në distancë’ siç është Zoom për ta dënuar njeriun me vdekje, e bënë edhe më mizor dhe më johuman,” thotë Drejtori i Human Rights Watch për Azinë, Phil Robertson. 

Këshilltarja e Amnesty International, Chiara Sangiorgio, tha se dënimi me vdekje është mjaft mizor dhe johuman, pavarësisht nëse shpallet me Zoom ose i shpallet personit i cili ndodhet në burg.

“Ky rast na kujton edhe një herë se Singapori vazhdon të sfidoj të drejtën dhe standartet ndërkombëtare duke shpallur dënim me vdekje për trafik droge,” tha Sangiorgio.