Përpjekja e 59-të e seancës konstituive, dështon votimi i Nënkryetarit serb të Parlamentit të Kosovës

Deputeti Nenad Rashiç nuk ka marrë votat e mjaftueshme për Nënkryetar të Parlamentit të Kosovës nga radhët e serbëve as në përpjekjen e 59-të të seancës konstituive.

Pas përpjekjes së dytë ku deputeti Nenad Rashiç mori 56 vota për, 1 deputet ka votuar kundër dhe 20 deputetë kanë abstenuar, Kryetari i Parlamentit, Dimal Basha kishte një apel për dalje nga kriza.

“Unë si kryetar Kuvendi mendoj që gjatë diskutimeve me kolegë deputetë që i kemi, ka pasur diskutime që mendoj se duhet të vazhdojnë edhe më tej dhe vlerësoj se në seancën tjetër që deputeti në fjalë edhe mund të marr votat e mjaftueshme për nënkryetar. Sa për njohurinë tuaj, jeni edhe dëshmitarë që është edhe i vetmi deputet me më së shumti vota për. Gjasat më të mëdha për t’u zgjedhur nënkryetar i ka Nenad Rashiç, prandaj unë e ndërpres këtë seancë këtu dhe vazhdojnë diskutimet mes grupeve parlamentare për të thirrur vazhdimin e saj që ta votojnë deputetin Nenad Rashiç,” tha Dimal Basha duke ndërprerë seancën pa saktësuar se kur do të vazhdojë meqë diskutimet do të vijojnë edhe brenda ditës, dhe do të jetë administrata ajo që do të njoftojë për vazhdimin e seancës konstituive.

Ndërkohë edhe sot nuk u votua asnjëri prej kandidatëve të Listës Srpska. I pari që u tërhoq në short ishte Branislav Nikoliç i cili nuk mori asnjë votë për, kundër votuan 55 dhe 25 abstenime.

Kandidati i dytë i tërhequr në short, Zlatan Elek gjithashtu nuk u votua nga asnjë deputet, kundër votuan 54 deputetë dhe 19 tjerë abstenuan.

I radhës ishte Stefan Kovaçeviç. Por as për të nuk pati vota. 53 deputetë ishin kundër dhe 19 abstenime.

Deputeti Zlatan Elek është eliminuar nga gara, pasi edhe pas tërheqjes së tretë në short dhe hedhjes në votim nuk i ka marrë votat e deputetëve për nënkryetar nga komuniteti serb.

Srgjan Popoviç ka qenë deputeti i radhës që është hedhur në votim për Nënkryetar të Parlamentit. As për këtë kandidat nuk ka pasur ndryshim rezultati: Asnjë votë për, 54 kundër dhe 19 abstenime.

Ka dështuar në përpjekjen e parë për t’u zgjedhur nënkryetar edhe Igor Simiq, për të cilin 55 deputetë votuan kundër, 18 abstenuan derisa asnjë votë nuk pati pro.

Stefan Kovaqeviç dhe Srgjan Popoviç kanë dështuar për herë të dytë të marrin vota për nënkryetar të Kuvendit. Në tentimin e tretë, sërish Srgjan Popoviç ka marrë 52 vota kundër, asnjë për dhe 15 abstenime. Si rrjedhojë është eliminuar nga gara pas tri përpjekjesh.

I radhës që është eliminuar nga gara është Branislav Nikoliç, i cili edhe në përpjekjen e tretë nuk mori asnjë votë për, derisa 54 votuan kundër dhe 15 abstenime.

Ndryshe, sipas aktgjykimit të Gjykatës Kushtetuese i cili u zbardhë më 18 Gusht, Parlamenti duhet të zgjedhë kryetarin dhe nënkryetarët brenda 30 ditësh.