Përpjekjet e fundit të Vuçiçit për të penguar njohjen e Kosovës nga Izraeli

E përditshmja izraelite, The Jerusalem Post duke konfirmuar se nesër, më 1 Shkurt 2021, Kosova dhe Izraeli do të vendosin edhe zyrtarisht marrëdhëniet diplomatike, ka raportuar edhe për përpjekjet e Presidentit të Serbisë, Aleksandar Vuçiç, për ta parandaluar këtë akt.

Serbia nuk e njeh shtetësinë e Kosovës, megjithatë dhe një burim diplomatik izraelit konfirmoi se Beogradi është i zhgënjyer me zhvillimet e fundit. Në shtator, burime të afërta me presidentin serb Aleksandar Vuçiç e bënë të qartë se nëse Beogradi hap një ambasadë në Jeruzalem, Serbia do të priste që Izraeli të mos e njihte Kosovën si shtet – megjithëse mund të mbante lidhje të nivelit më të ulët, shkruan gazeta izraelite.

Serbia mund ta hapë ende një ambasadë në Jeruzalem, siç përcakton marrëveshja e nënshkruar në Shtëpinë e Bardhë, por marrëdhëniet me Izraelin do të degradohen, i ka thënë një burim The Jerusalem Post.

Nënshkrimi i vendosjes zyrtare të marrëdhënieve diplomatike do të mbahet në një ngjarje virtuale me ministren e Punëve të Jashtme të Kosovës, Meliza Haradinaj-Stublla dhe ministrin e Jashtëm të Izraelit, Gaby Ashkenazi. Ministra e Jashtme kosovare kishte planifikuar ta vizitonte Izraelin këtë javë, por udhëtimi është shtyrë sepse Izraeli ka ndaluar të gjitha fluturimet për shkak të COVID-19, shkruan ndër tjerash ky medium.

Ndryshe, njohja e Kosovës nga Izraeli erdhi si pjesë e marrëveshjes midis Kosovës dhe Serbisë të ndërmjetësuar nga administrata Trump në shtator. Marrëveshja përfshin gjithashtu normalizimin midis Izraelit dhe Kosovës dhe që të Kosova dhe Serbia të hapnin ambasadat e tyre në Jeruzalem.

Kosova është vendi i parë me shumicë myslimane që do ta vendos ambasadën e saj në Jerusalem, dhe bashkë me Serbinë, vendet e para evropiane që e bëjnë këtë. Deri tani, vetëm SHBA dhe Guatemala kanë ambasadat e tyre në Jerusalem. Shumica e vendeve kanë zgjedhur t’i vendosin dhe t’i mbajnë ambasadat e tyre në Tel Aviv.