Përpjekjet për asgjësimin e opozitës, Berisha: Të ngrihemi deri në largimin e Edi Ramës!

Një ditë pasi Kryesia e PD vendosi për një Protestë Kombëtare më 11 shkurt kundër Kryeministrit Edi Rama, pas situatës së krijuar me “Skandalin McGonigal”, sot Kryetari i Partisë Demokratike, Sali Berisha, mblodhi Grupin Parlamentar ku u diskutua akti i pashembullt i Ramës për të shkatërruar opozitën shqiptare përmes një zytari të lartë të FBI si, Charles McGonigal!

Pas analizës që i bëri situatës, Kryetari i Partisë Demokratike tha se përpjekja kriminale e Edi Ramës për asgjësimin e opozitës nuk ka përfunduar, sepse ai nuk njeh asnjë lloj norme, njeh vetëm një parim: Frikën! Prandaj o sot, o kurrë, tha Berisha, opozita duhet të ngrihet në një revolucion demokratik, me një lëvizje të qëndrueshme gjer në largimin e këtij regjimi nga pushteti.

“Mblidhemi në një kohë kritike në shumë aspekte, regjimi i kalbur i Edi Ramës është sot regjimi më i diskredituar pas Koresë së Veriut, Carit dhe Lukashenkos.

Edi Rama, siç dëshmojnë dokumentet e pakundërshtueshme, është sjellë ndaj SHBA sikur të ishin një vend armik dhe jo kontributori kryesor në historinë e lirisë së kombit shqiptar. Dhe jo udhëheqësi i botës së lirë, i aleancës së Atlantikut të Veriut, vendi kryesor përgjegjës për paqen dhe sigurinë e vendeve të lira.

Akti i Edi Ramës është një thikë e tmerrshme pas shpine që ky njeri, i cili nuk ka nder, nuk ka komb, nuk ka atdhe, nuk ka flamur, nuk ka dinjitet, ka bërë ndaj kombit amerikan, SHBA, qeverisë së SHBA, por edhe më gjerë.

Edi Rama ka përbaltur pas Enver Hoxhës, më shumë se kushdo tjetër, emrin e shqiptarit dhe Shqipërisë, para kombit amerikan, para qeverisë së SHBA dhe Kongresit të këtij vendi dhe institucioneve të tjera të këtij vendi.

Edi Rama, e vërteta thashë edhe njëherë, është sjellë me aktin e tij, siç sillet armiqtë ndaj njëri-tjetrit.

Në këtë mënyrë, ai ka lënduar çdo shqiptar, i cili ka mirënjohje si virtyt të palëkundur moral të tij. Ka lënduar në mënyrë të tmerrshme shqiptaro-amerikanët, të cilët që nga viti 1910 e gjer më sot, në mënyrë të pareshtur, trokasin në dyert e ligjvënësve të tyre, kongresmenëve dhe senatorëve, në dyert e institucioneve të SHBA e gjer në derën e madhe të Shtëpisë së Madhe për të kërkuar ndihmë dhe mbështetje për Shqipërinë dhe Kosovën. Për ata, kjo është ndoshta, pas diktaturës, java më e vështirë e tyre, para qytetarëve, miqve të tyre amerikanë, para ligjvënësve, para zyrtarëve, para të gjithëve,” tha Sali Berisha duke shtuar se Edi Rama, këtë akt të pashembullt e ka bërë vetëm e vetëm të shkatërrojë opozitën shqiptare.

Edi Rama është sjellë sikur të ishte biri i Enverit, ose i Kim Jong-unit, dhe në këtë kontekst, mund të themi se ka kryer një akt me pasoja absolutisht të rënda.

Ky është një rast që skalitet për fat të keq, gjatë në memorie. Kësaj i thonë të të vijë nga ai që kurrë nuk e pret.

Por Edi Rama, këtë akt të pashembullt, e ka bërë vetëm e vetëm të shkatërrojë opozitën shqiptare.
Këtë korruptim të njërit prej njerëzve absolutisht më të rëndësishëm në fushën e sigurisë së SHBA, ky njeri që mund t’i vësh çdo lloj epiteti, e ka bërë vetëm për të rrënuar në një akt armiqësor absolut ndaj demokracisë, për të rrënuar opozitën shqiptare.

Ka korruptuar Charles McGonigal, ka shfrytëzuar dobësitë e një njeriu të degraduar që shkelmon betimin që ka bërë për t’i shërbyer vendit të tij, dhe e ka përdorur atë për rrënimin e opozitës shqiptare, pasi ajo kishte humbur zgjedhjet.

Por kjo nuk i mjaftonte atij. Ai duhet ta merrte peng këtë opozitë. Një kriminel si ky, është vështirë ta imagjinosh në politikë.,” tha Kryetari i Partisë Demokratike duke konstatuar se Edi Rama kishte një qëllim tjetër, të merrte peng, siç e mori, ish-kryetarin e PD-së, për rrjedhojë Partinë Demokratike!

“Edi Rama për arsye të sigurisë kombëtare duhet të bënte një transparencë për paratë e përdorura nga Lulzim Basha. Kishte rrugë ligjore kushtetuese. Rruga ligjore ishte prokuroria shqiptare dhe Departamenti i Drejtësisë në SHBA, FBI.

Shqipëria ka marrëveshje ekstradimi me SHBA. Hetimi mund të bëhej i plotë.

Por ai kishte një qëllim tjetër: të merrte peng, siç e mori, ish-kryetarin e PD-së, për rrjedhojë Partinë Demokratike.

Vetëm një njeri që nuk ka nocionet më minimale, ose nuk respekton nocionet më elementare të demokracisë, vepron në këtë mënyrë.” tha ai para Grupit Parlamentar duke folur për aktin e turpshëm të Kryeministrit Edi Rama:

“Një kryetar opozite, kur shkel rregullat, shkarkohet. Kur shkel ligjet, përballet me pasojat ligjore. Por peng nuk merret kurrë.

Shikoni se çfarë bën Edvin Koleka. Çfarë urrejtje të papërmbajtur ka ky njeri për opozitën? Po more peng kryetarin e opozitës, ke marrë peng demokracinë.

Kjo ndodhi.”

Në fund Kryetari i Partisë Demokratike, Sali Berisha, tha se Edi Rama nuk njeh asnjë lloj norme, njeh vetëm një parim, Frikën! Dhe kësaj here duhet të trembet shumë ndërsa u zotua se ky revolucion nuk do dështojë kurrë dhe do të njohë vetëm fitore.

“U ndala në këtë analizë, se sa herë që ta trajtosh, gjithnjë e më e zezë del.

Por a përfundoi me këto përpjekja kriminale e Edi Ramës për asgjësimin e opozitës?

Jo! Një gjë duhet t’ju them ju. Edi Rama nuk njeh asnjë lloj norme, njeh vetëm një parim: Frikën!

Dhe kësaj here duhet të trembet shumë. Duhet të trembet shumë nga shqiptarët sepse ai vazhdon qëndrimin e tij kriminal për asgjësimin e pluralizmit në Shqipëri dhe opozitës në Shqipëri.

Vazhdon dhe beson se do ia dalë me produktet e krijuara me McGonigal-in. Dhe jo vetëm me të. Faktikisht edhe me McGonigal-in me fustan.

Duhet t’i themi gjërat se zonja njeh Alibashën publikisht si kryetar.

Pra, rrethanat janë të tilla, o sot o kurrë, duhet të ngrihemi në një revolucion demokratik, me një lëvizje të qëndrueshme gjer në largimin e këtij regjimi nga pushteti.

Edi Rama është një kalbësirë që kundërmon çdo ditë turp për shqiptarët.

Është një kalbësirë që kundërmon çdo ditë vjedhje për shqiptarët.

Është një kalbësirë që përpiqet të bëjë gjithçka për të asgjësuar opozitën e vërtetë dhe pluralizmin në Shqipëri,” tha Berisha duke shtuar se Grup Parlamentar e kanë detyrë të madhe, së pari në një debat dhe dialog intensiv me zgjedhësit tanë, t’u qartësojmë gjithçka.

“Pse është jetike kjo betejë, ky revolucion. Do e dorëzojmë ne?

Kurrë, ky revolucion nuk do dështojë kurrë. Ky revolucion do të njohë vetëm fitore.

Duhet të shpëtojmë Shqipërinë nga ky njeri.

Ju jeni dëshmitarë se çfarë qëndrimesh mbahen ndaj nesh në parlament. Ju duhet të sqaroni zgjedhësit se ata nuk e dinë se në ç’mënyrë të turpshme dhe banditeske, sillet me urdhër të Edi Ramës, Linda e parlamentit.

Duhet ta dinë se çfarë intrigash të ulëta thuren ndaj deputetëve shqiptarë në parlament. Siç na takonte dhe siç prisnin shqiptarët dhe miqtë tanë, kërkuam debat, firmosëm për të kërkuar debat për këtë aferë që ka tronditur, ka ulur në pikën më të thellë marrëdhëniet mes dy vendeve.

Çfarë u bë? Refuzuan në mënyrë antiligjore. Lexuan ato që kishin dhe votuan në mënyrë kriminale dhe staliniste propozimin e Alibashës për përjashtimin nga grupi parlamentar. Alibasha i marrë peng me dosje, nënshtrohet verbërisht urdhrave të Lindës dhe Edi Ramës.

Çfarë do të thotë kjo, duhet t’ia sqarojmë qytetarëve: si mund të pranohet përjashtimi i katër deputetëve pa asnjë ligj, pa asnjë rregull, pa asnjë gjë. Sot nuk përjashton dot katër nxënës nga klasa.

Kurse këta sillen si banditë, si njerëz që ndajnë flligështinë më të madhe me njëri-tjetrin.

Ne do ngrihemi, kjo situatë nuk mund të pranohet,” tha Krydemokrati i bindur se lojërat me Alibashën, se keqpërdorimi i Lindës, nuk do ia zgjidhin problemet Edi Ramës.

Vijmë te qëndrimi i fundit. Ne paraqitëm kërkesën për debat. Gjëja më normale. Na bllokuan në mënyrën më antiligjore.

Për të zevendësuar këtë, tani del interpelanca e Alibashës me padronin e tij.

Se i bashkërendojnë. Po kjo është e turpshme. Por ne nuk lëshojmë.

Ne kërkojmë me urgjencë debat në parlament për këtë çështje thelbësore.

Me Alibashën të bëjë ç’të dojë Edi Rama. Është e turpshme që ta përdorë dhe diskreditojë në këtë mënyrë. E gjitha u bë për një mocion me debat, tani përpiqet ta kalojë me një interpelancë me Alibashën.

Po a do e lëshojmë ne parlamentin? Kurrrë. Ne do bëjmë betejë në parlament që të bindim çdo shqiptar se jemi të gatshëm për çdo sakrificë për të mbrojtur votën e lirë.

Nuk e lëshojmë ne parlamentin, të marrin çdo masë, të sillen si të duan. Ne do mbrojmë çdo gjë në interes të shqiptarëve.

Ndaj dhe të harrojnë ata se përjashtuan pesë, por ju jeni të tjerë sa 15 më shumë,” tha lideri i opozitës duke i bërë thirrje deputetëve për mobilizim për datën 11 Shkurt në ora 12:00 para Kryeministrisë:

“Ndaj të përgatitet mirë Edi Rama, se lojërat me Alibashën, se keqpërdorimi i Lindës, nuk do ia zgjidhin problemet atij.

Ai parlament ka parë të gjitha llojet e kryetarëve, por kurrë një si ajo nuk ka ekzistuar aty.

Ndaj dhe mbetet që ne të shumëfishojmë aktivitetin tonë parlamentar dhe të përballemi me këtë bandë, që nuk ka Kushtetutë, nuk ka ligj.”