Përpjekjet për konsensus, askush nuk i përgjigjet ftesës së Veselit për takim

Ftesës së kryetarit të Parlamentiit, Kadri Veseli, për një takim të përbashkët me udhëheqësit e partive politike parlamentare për të arritur një konsensus nacional për fazën e re të dialogut Kosovë-Serbi, duket nuk do t’i përgjigjen pozitivisht partitë opozitare, raporton Koha.net.

Partia më e madhe opozitare në vend, Lidhja Demokratike e Kosovës, LDK, tha se ende nuk ka qëndrim zyrtar sa i përket kësaj ftese, por sipas zyrtarëve të kësaj partie me gjasë përgjigja do të jetë negative.

“Nuk kemi ende qëndrim zyrtar si LDK, por konsideroj që nuk duhet të shkojmë dhe nuk kemi pse të shkojmë thjeshtë sa për të thënë qëndrimin e LDK-së. Kjo është e panevojshme për shkak se ne qëndrimin tonë publikisht dhe vazhdimisht po e themi dhe besoj që përgjigja jonë do të jetë negative për një takim të tillë për nesër”, tha Sekretari i Përgjithshëm i LDK-së, njëherësh edhe deputet i kësaj partie, Ismet Beqiri.

Madje, ai ka hedhur poshtë çfarëdo mundësie që LDK t’i bashkohet pozitës në bisedimet me Serbinë.

“Sa i përket mundësisë që LDK t’i bashkohet pozitës eventualisht në bisedime me Serbinë ne kemi thënë vazhdimisht dha ai qëndrim i yni mbetet e pandryshueshëm, konsiderojmë që këto institucione janë shumë të dobëta dhe shumë të brishta, jo funksionale dhe ju mungon një legjitimitet dhe fuqi për të marrë vendime. Konsiderojmë që vetëm zgjedhjet e reja mund të nxjerrin institucione kredibile dhe funksionale, pra si rezultat i kësaj po e them edhe një herë ne nuk i bashkohemi kurrfarë ekipi të negociatave për dialogun. LDK-ja ka qenë gjithmonë për dialog, mirëpo jo në këtë formë dhe në këtë mënyrë, si dhe me institucione të tilla çfarë i kemi. Ne na duhet një fuqizim i legjitimitetit të institucioneve dhe kjo mund të bëhet vetëm nëpërmjet votës së lirë të qytetarëve të Kosovës”, tha Beqiri.

Anëtarët e kryesisë së Lëvizjes Vetëvendosje, nuk kanë treguar për KosovaPress se a do të marrin pjesë në takimin e nesërm, duke thënë se do të konsultohen dhe pastaj do të japin përgjigje.

As nga Partia Socialdemokrate nuk u bë e ditur nëse do të marrin pjesë në këtë mbledhje. Zëdhënësi i kësaj partie Shkodran Hoti tha se nuk ka informacion se a kanë marrë një ftesë të tillë.

Aleanca për Ardhmërinë e Kosovës, AAK, edhe pse është pjesë e koalicionit qeverisës me Partinë Demokratike që udhëhiqet nga Veseli, ende nuk kanë një qëndrim zyrtar se a do të merre pjesë në takim. Shefi i grupit parlamentar të AAK-së, Ahmet Isufi, ndonëse ka thënë se ende nuk e kanë shqyrtuar se a do të marrin pjesë apo jo, tha se qysh në fillim të tryezave me partitë politike janë shprehur të gatshëm për të dhënë kontributin e tyre.

“Ende nuk e kemi shqyrtuar, por sigurisht që ne kemi thënë qysh në fillim të takimeve që janë kërkuar për tryezë që do të jemi gjithmonë të gatshëm të japim kontributin tonë”, tha ai.

Ndryshe, sipas ftesës së publikuar edhe në media thuhet se takimi do të mbahet nesër, e hënë, në ora 10:00 në Kuvendin e Kosovës. Takimi do të jetë i mbyllur dhe secili subjekt politik do të përfaqësohet në bazë të formatit 1+1.