Përplasja në selinë e FRD/ Erion Veliajt, Presidenca: O vemje, mbajë shënim…
Pas përplasjes së Presidentit të Republikës, Ilir Meta, me policinë në selinë e FRD dhe dhe deklaratave të kryetarit të Bashkisë Tiranë, Erion Veliaj, ka reaguar Presidenca përmes zëdhënësit Tedi Blushi duke paralajmëruar Veliajn që të mos guxoj më të bëjë veprime të paligjshme dhe të porositë dhunë kundër Opozitës, ndryshe do të dorëzohet te gjykatësi popull.
“Mos e detyro Presidentin e Republikës t’u bëjë thirrje qytetarëve të të përzenë që sot nga Bashkia e Tiranës, si një qen rrugësh të pasterilizuar, o provokator ordiner i skizofrenit me kartelë.
O vemje, mbaj shënim:
1. Nuk ke për t’i shpëtuar KURRË dënimit mbarëqytetar, as për shembjen kriminale të Teatrit Kombëtar, as për aferën e zezë sterrë të inceratorëve dhe as për shumë afera të tjera.
2. MOS GUXO MË të bësh veprime të paligjshme dhe të porositësh dhunë kundër Opozitës, se do të dorëzojmë te gjykatësi popull o horr gjirizash dhe t’i besoj e kupton mirë se çdo do të thotë kjo,” thekson zënëdhënësi i Presidentit, Tedi Blushi, në reagimin e tij përmes rrjetit social Facebook.
Pas përplasjes së Presidentit të Republikës me Policinë Bashkiake në selinë e FRD, ku kërkohej të lirohen zyrat e Frymës së Re Demokratike, Kryetari i Bashkisë Tiranë, Erion Veliaj, ka reagon me akuza dhe fyerje ndaj Ilir Metës duke e cilësuar një të degraduar mendor.
“Nëse Presidenti për çdo paqartësi që ka shkon dhe zihet me grushte, fyen uniformat, i bullizon, i kërcënon, dhe prek me dorë e rrihet, kemi të bëjmë me një degradim të rëndë të presidentit dhe institucionit. Nëse dikush ka problem me një shkresë, mjafton të shkojë në Gjykatën Administrative, siç bëj unë. Presidenti duhet të kuptojë se ajo është një zyrë në pronësi të Bashkisë së Tiranës, me hipotekë. Sipas ligjit për partitë politike, partitë që nuk kanë asnjë mandat parlamentar dhe as 1% të votave të popullit, nuk e detyrojnë dot bashkinë. Mënyra më e shkurtër e strehimit në Tiranë do të ishte, krijo një parti dhe shko zapto një pronë, por kjo nuk funksionon. Kur shumë parti të tjera si partia e z.Milo, ajo e Lirive të Mohuara, etj, e kanë respektuar lirimin e ambientit, pasi iu ka mbaruar kontrata, është kërkuar me shumë mirësjellje lirimi i ambienteve edhe për këta.
E kemi kërkuar lirimin nga të gjitha partitë politike dhe të gjitha e kanë bërë qartazi, kjo parti vendosi të mos zbatonte ligjin, të sillet si zaptuese dhe të provokojë me presidentit, një njeri të çoroditur mendërisht. Është gjynah, për të ardhur keq. Nëse ka nevojë për sqarime kjo mund të bëhet në bashki, ose të çohet në gjykatë. përdorimi i njerëzve që kanë degraduar mendërisht më duket fyerje e madhe edhe për institucionin e Presidencës. Sa i përket pronës publike të Bashkisë së Tiranës është, ka qenë dhe do të jetë pronë e bashkisë. Unë e kuptoj që partitë politike pronën publike këtu e kanë abuzuar si interes të tyre. Këtë nuk e luan as topi, që kjo do të ndryshojë,” tha Erion Veliaj për News 24 duke përfunduar:
“Me këtë politikën e Metës dhe Berishës “KCK”, dua t’i them Ilir Metës dhe kujtdo të kjo minorancë se ‘koha jua mbaroi, nuk keni shans, do ta lironi pronën publike’. Burrat e dhunshëm, ata të alkoolizuar, jemi gati t’iu ofrojmë programe falas për rehabilitim, secili duhet të ketë një shans të dytë dhe ne jemi të gatshëm t’ua japim.”
