Përplasje me armë në Pedonale, Voltana Ademi: Shumë e shqetësuar! Në qendër të Shkodrës…
Pas përplasjes me armë në mes të dy grupeve kriminale në Pedonalen e qytetit të Shkodrës, ku mbeti e palgosur një kalimtare, ka reaguar Kryetarja e Bashkisë, Voltana Ademi, shumë e shqetësuar për ngjarjet e rënda që kanë tronditur rendin publik në qytetin e Shkodrës!
“Në qendër të Shkodrës, në Pedonalen tonë, aty ku ne lëvizim në çdo moment të ditës, krimi godet! Një person i pafajshëm plagoset, thjesht duke qenë kalimtar. Pak orë më pas, në një lagje tjetër të Shkodrës, një shpërthim eksplozivi ka ngjallur ankth tek qytetarët!”
Duke i bërë thirrje Ministrit të Brendshëm, Drejtorit të Përgjithshëm të Policisë së Shtetit, drejtuesve vendorë të Policisë, për zbardhjen një orë e më parë të këtyre ngjarjeve kriminale dhe të vëjë para përgjegjësisë autorët, Kryetarja e Bashkisë Shkodër, Voltana Ademi përfundon:
“Shkodra, shkodranët, kanë nevojë për rend dhe siguri në rrugët ku ata lëvizin dhe sidomos, në shtëpitë e tyre. Është detyra e strukturave të shtetit t’ua garantojë këtë.”
Ndryshe, policia e shtetit duke dhënë detaje për ngjarjen e rëndë në Pedonalen e Shkodrës ku ka pasur shkëmbim zjarri mes dy grupeve kriminale, për pasojë e plagosur nga plumbat ka mbetur kalimtarja e rastit, Liljana Jeremia, 35 vjeç. Për ngjarjen janë arrestuar tre të rinj, njëri prej tyre, Riad Xheladini 22 vjeç, banues në Shkup të Maqedonisë, ndërsa dy tjerët nga Durrësi, Arjan Rexha 31 vjeç, dhe Ension Buraku 28 vjeç, të cilët kanë qëlluar me armë zjarri shtetasin Mesad Meta, 26 vjeç, ku dhe ky i fundit iu është përgjigjur po me plumba.
